ദൃശ്യമികവിലും കളക്ഷന് റെക്കോര്ഡിലും ഇന്ത്യന് സിനിമയില് ചരിത്രമായ ബ്രഹ്മാണ്ഡചിത്രം ബാഹുബലിക്ക് പിന്നാലെ ദൃശ്യവിരുന്നിന്റെ മികവുമായി മറ്റൊരു സിനിമയും കൂടി പ്രദര്ശനത്തിനെത്തുന്നു. ദീപികാ പദുക്കോണ് നായികയാകുന്ന ‘പദ്മാവതി’യാണ് പ്രേക്ഷകരെ വിസ്മയിപ്പിക്കാന് ഒരുങ്ങുന്നത്.
ചിത്രത്തിന്റെ ട്രെയിലറിന് തന്നെ വന് വരവേല്പ്പാണ് ലഭിച്ചിരിക്കുന്നത്. ഈ ചിത്രം ബാഹുബലിയെ മറികടക്കുമോ എന്നാണ് പ്രേക്ഷകര് ഉറ്റുനോക്കുന്നത്. മാത്രമല്ല ബാഹുബലിയുടെ അമരക്കാരന് രാജമൗലിയും പദ്മാവതിയുടെ ട്രെയിലറിനെ പ്രശംസിച്ച് രംഗത്ത് എത്തിയിരിക്കുകയാണ്.
‘അതിമനോഹരമായ സിനിമ. എല്ലാ ഫ്രെയിമുകളിലും സംവിധായകന്റെ മികവ് വ്യക്തമാണ് രാജമൗലി പറയുന്നു. മുന്നിര താരങ്ങള് അണിനിരക്കുന്ന ബിഗ് ബഡ്ജറ്റ് ചിത്രം സംവിധാനം ചെയ്തത് സഞ്ജയ് ലീല ബന്സാലിയാണ്. ദീപിക പദുക്കോണിനു പുറമേ രണ്വീര് സിംഗ്, ഷാഹിദ് കപൂര് തുടങ്ങിയവരാണ് അഭിനേതാക്കള്.
അലാവുദ്ദീന് ഖില്ജിക്ക് ചിറ്റോര് രാജകുമാരിയായ പദ്മാവതിയോട് തോന്നുന്ന പ്രണയമാണ് ചിത്രത്തിന്റെ ഇതിവൃത്തം. ബാജിറാവു മസ്താനി തുടങ്ങിയ ചിത്രങ്ങള്ക്ക് ശേഷം രണ്വീര് സിംഗ്, ദീപിക, സജ്ഞയ് തുടങ്ങിയവര് ഒന്നിക്കുന്നു എന്നതും ആരാധകര്ക്ക് കൂടുതല് പ്രതീക്ഷ തരുന്നു.
ബോളിവുഡിലെ ഏറ്റവും ചെലവേറിയ ചിത്രങ്ങളിലൊന്ന് എന്നതും ചിത്രത്തിന് വാര്ത്താ പ്രാധാന്യം നേടികൊടുത്തിരുന്നു. ബാജിറാവു മസ്താനിക്ക് തിരക്കഥ എഴുതിയ പ്രകാശ് കപാഡിയ തന്നെയാണ് പദ്മാവതിയുടെയും തിരക്കഥ തയ്യാറാക്കിയിരിക്കുന്നത്. ഡിസംബറിലാണ് ചിത്രം തിയറ്ററുകളിലെത്തുന്നത്.
Discussion about this post