രാജ്യത്തൊന്നാകെ പ്രതിഷേധങ്ങള്‍ അലയടിക്കുന്നതിനിടെ സഞ്ജയ് ലീല ബന്‍സാലി സംവിധാനം ചെയ്ത ബോളിവുഡ് ചിത്രം പത്മാവതിയുടെ റിലീസിംഗ് മാറ്റി. സംവിധായകന്‍ തന്നെയാണ് ചിത്രത്തിന്റെ റിലീസിംഗ് മാറ്റിയ വിവരം അറിയിച്ചത്. ചിത്രം പ്രദര്‍ശിപ്പിക്കരുതെന്ന ആവശ്യവുമായി വിവിധ ഹിന്ദു സംഘടനകള്‍ രാജ്യത്ത് പ്രതിഷേധങ്ങള്‍ നടത്തിയിരുന്നു.
താരങ്ങളായ ദീപിക പദുകോണ്‍, രണ്‍വീര്‍ സിംഗ് എന്നിവര്‍ക്ക് വധഭീഷണി വരെ ഉയര്‍ന്ന സാഹചര്യത്തിലാണ് പത്മാവതിയുടെ റിലീസ് മാറ്റികൊണ്ടുള്ള സംവിധായകന്റെ തീരുമാനം. പുതിയ റിലീസിംഗ് ഡേറ്റ് ഉടന്‍ അറിയിക്കുമെന്നും ബന്‍സാലി പറഞ്ഞു.
രജപുത്ര രാജ്ഞി റാണി പത്മിനിയുടെ ജീവിതത്തെ ആസ്പദമാക്കി ഒരുക്കിയ ചിത്രമാണ് പത്മാവതി. റാണി പത്മിനിയോട് ഖില്‍ജി രാജവംശത്തിലെ സുല്‍ത്താന്‍ അലാവുദ്ദീന്‍ ഖില്‍ജിക്ക് തോന്നുന്ന പ്രണയമാണ് ചിത്രത്തിന്റെ പ്രമേയം. ദീപികയാണ് റാണി പത്മിനിയായി പ്രേക്ഷകര്‍ക്ക് മുമ്പിലെത്തുന്നത്. രണ്‍വീര്‍ സിംഗാണ് അലാവുദ്ദീന്‍ ഖില്‍ജി. റാണി പത്മിനിയുടെ ഭര്‍ത്താവ് രത്തന്‍ സിംഗിന്റെ വേഷത്തില്‍ ഷാഹിദ് കപൂര്‍ എത്തും.
160 കോടി രൂപ മുതല്‍മുടക്കുള്ള ചിത്രം നിര്‍മിക്കുന്നത് ബന്‍സാലി പ്രൊഡക്ഷന്‍സും വിയാകോം 18 പിക്ചേഴ്സും ചേര്‍ന്നാണ്. ചിത്രീകരണം തുടങ്ങിയതു മുതല്‍ വാര്‍ത്തകളിലിടം പിടിച്ച ചിത്രമാണ് പത്മാവതി.
Discussion about this post