ബാഗ്ദാദ്: റഷ്യ ആതിഥ്യം വഹിക്കാനൊരുങ്ങുന്ന ലോകകപ്പ് ഫുട്‌ബോള്‍ മല്‍സരത്തിനിടെ ആക്രമണം നടത്താന്‍ ഭീകര സംഘടനയായ ഇസ്ലാമിക് സ്റ്റേറ്റ് പദ്ധതിയിടുന്നതായി റിപ്പോര്‍ട്ട്. ഐഎസിനെതിരെ റഷ്യ നടപ്പാക്കിയ സൈനിക നീക്കങ്ങള്‍ക്ക് മറുപടിയായാണ് ഐഎസിന്റെ ആക്രമണ പദ്ധതി. രാജ്യാന്തര വിശകലന സ്ഥാപനമായ ഐഎച്ച്എസ് ആണ് ഇക്കാര്യം റിപ്പോര്‍ട്ട് ചെയ്തത്. റഷ്യയില്‍ ലോകകപ്പിനിടെ ആക്രമണം നടത്തി രാജ്യാന്തര തലത്തില്‍ വീണ്ടും കരുത്താര്‍ജിക്കാനാണ് സംഘടനയുടെ പദ്ധതി. ഐഎസ് വിരുദ്ധശക്തികളായ സൗദി അറേബ്യ, ഇറാന്‍ എന്നീ രാജ്യങ്ങളുടെ ദേശീയ ടീമുകളും ലോകകപ്പ് മല്‍സരങ്ങളില്‍ പങ്കെടുക്കുന്നുണ്ട്. ഇതും റഷ്യയിലെ ലോകകപ്പിനെ ലക്ഷ്യം വയ്ക്കാന്‍ സംഘടനയ്ക്കു പ്രചോദനമായെന്നാണ് വിവരം.
2014 ലാണ് സിറിയയുടെയും ഇറാഖിലെയും വിവിധ ഭാഗങ്ങളുടെ ഖലീഫയായി ഐഎസ് മേധാവി അബൂബക്കര്‍ അല്‍ ബാഗ്ദാദി സ്വയം പ്രഖ്യാപിച്ചത്. സംഘടന തകര്‍ന്നെങ്കിലും അബൂബക്കര്‍ അല്‍ ബാഗ്ദാദി ഇപ്പോഴും ഭീകരപ്രവര്‍ത്തനങ്ങളുമായി മുന്നോട്ടു പോകുന്നുണ്ടെന്നാണ് റിപ്പോര്‍ട്ട്. 2016 ല്‍ ഐഎസ് ആക്രമണങ്ങളില്‍ 6500 ഓളം പേര് കൊല്ലപ്പെട്ടിരുന്നെങ്കിലും 2017ല്‍ ഇത് അഞ്ചില്‍ രണ്ടായി കുറഞ്ഞിരുന്നു. എന്നാല്‍ തിരിച്ചടികള്‍ക്കിടയിലും സംഘടന ഉത്തരവാദിത്തമേറ്റെടുക്കുന്ന ആക്രമങ്ങള്‍ കൂടുന്നതായാണ് കണക്കുകള്‍.
കഴിഞ്ഞ നവംബറോടെ ഇറാഖിലും സിറിയയിലും ഐഎസ് നാമാവശേഷമായെങ്കിലും ഇസ്താംബുള്‍, ലണ്ടന്‍, മാഞ്ചസ്റ്റര്‍, ബാഴ്‌സലോണ, ടെഹ്‌റാന്‍ എന്നിവിടങ്ങളില്‍ അടുത്തിടെ ഉണ്ടായ ആക്രമണങ്ങളുടെ ഉത്തരവാദിത്തം സംഘടന ഏറ്റെടുത്തിരുന്നു. 2016 ല്‍ സൗദിയിലെ പ്രധാന തീര്‍ത്ഥാടന കേന്ദ്രമായ മക്കയും സംഘടന ലക്ഷ്യമിട്ടിരുന്നു.
Discussion about this post