ആന്ധ്രാ പ്രദേശ് മുഖ്യമന്ത്രിയായ ചന്ദ്രബാബു നായിഡുവിനെതിരെ വൈ.എസ്.ആര്‍ കോണ്‍ഗ്രസ് പാര്‍ട്ടിയുടെ നേതാവായ ജഗന്‍ മോഹന്‍ റെഡ്ഡി രംഗത്തെത്തിയിരിക്കുയാണ്. ചന്ദ്രബാബു നായിഡു ഏപ്രില്‍ 20ന് ആന്ധ്രയ്ക്ക് പ്രത്യേക പദവി നല്‍കാത്തതില്‍ പ്രതിഷേധിച്ച് ഉപവാസ സമരം പ്രഖ്യാപിച്ചിരിക്കുന്ന സാഹചര്യത്തിലാണ് ജഗന്‍ മോഹന്‍ റെഡ്ഡി അദ്ദേഹത്തിനെതിരെ വന്നിരിക്കുന്നത്. ഉപവാസത്തിന് പകരം അദ്ദേഹം തന്റെ പാര്‍ട്ടിയായ തെലുഗു ദേശം പാര്‍ട്ടിയിലെ എല്ലാ എം.പിമാരോടും രാജിവെക്കാന്‍ നിര്‍ദേശിക്കണമായിരുന്നു എന്നാണ് ജഗന്‍ മോഹന്റെ നിലപാട്.
യൈ.എസ്.ആര്‍ കോണ്‍ഗ്രസ് അവരുടെ എല്ലാ എം.പിമാരോടും രാജിവെക്കാന്‍ ആവശ്യപ്പെട്ടിരുന്നു. ഭരണത്തിലുള്ള പാര്‍ട്ടിയായ തെലുഗു ദേശം പാര്‍ട്ടിയുടെ എം.പിമാര്‍ രാജിവെച്ചാല്‍ അത് ദേശീയ തലത്തില്‍ തന്നെ ഒരു ചര്‍ച്ചയ്ക്ക് വഴിയൊരുക്കുമെന്നും ജഗന്‍ മോഹന്‍ റെഡ്ഡി പറഞ്ഞു. നായിഡു ജനങ്ങളെ വഞ്ചിക്കുകയാണെന്നും അദ്ദേഹം കൂട്ടിച്ചേര്‍ത്തു. ഉപവാസം നടത്താനിരിക്കുന്ന തീയ്യതിയായ ഏപ്രില്‍ 20 എന്നുള്ളത് തെലുഗു ദേശം പാര്‍ട്ടിയുടെ സ്ഥാപക ദിനം കൂടിയാണ്.
ആന്ധ്രയ്ക്ക് പ്രത്യേക പദവി നല്‍കണമെന്ന ആവശ്യം ഉന്നയിച്ച് ആന്ധ്രാ പ്രദേശ് പീപ്പിള്‍ ഫോറം തിങ്കളാഴ്ച സംസ്ഥാന ഹര്‍ത്താലിന് ആഹ്വാനം ചെയ്തിരുന്നു. ഇതിന് പ്രതിപക്ഷ പാര്‍ട്ടികളായ കോണ്‍ഗ്രസും, യൈ.എസ്.ആര്‍.കോണ്‍ഗ്രസും, ഇടത് പാര്‍ട്ടികളും പിന്തുണ പ്രഖ്യാപിച്ചിരുന്നു. എന്നാല്‍ ചന്ദ്രബാബു നായിഡു ഹര്‍ത്താലിനെതിരായിരുന്നു. ഹര്‍ത്താലുകള്‍ വികസനത്തെ ബാധിക്കുമെന്നാണ് അദ്ദേഹത്തിന്റെ അഭിപ്രായം. അതേസമയം ചന്ദ്രബാബു നായിഡു പ്രതിപക്ഷത്തിരുന്നപ്പോള്‍ കുറെയേറെ ഹര്‍ത്താലുകള്‍ സംഘടിപ്പിച്ചിരുന്നുവെന്ന് ജഗന്‍ മോഹന്‍ റെഡ്ഡി ചൂണ്ടിക്കാണിച്ചു. ഇൗ നിലപാട് അദ്ദേഹത്തിന്റെ ഇരട്ടത്താപ്പ് വ്യക്തമാക്കുന്നുവെന്നും ജഗന്‍ മോഹന്‍ ചൂണ്ടിക്കാട്ടി.
Discussion about this post