മോഹന്‍ലാല്‍ നായകനായെത്തിയ ബ്രഹ്മാണ്ഡ ചിത്രം “ഒടിയന്‍” കാണാതെ ഓണ്‍ലൈനിലൂടെ ഡീഗ്രേഡ് ചെയ്തയാള്‍ക്ക് പണി കൊടുത്ത് തീയ്യേറ്റര്‍ അധികൃതര്‍. റാന്നി ക്യാപ്പിറ്റോള്‍ തീയ്യേറ്ററാണ് ഡീഗ്രേഡ് ചെയ്യാന്‍ ശ്രമിച്ചയാള്‍ക്ക് പണി കൊടുത്തത്. ചിത്രത്തിന്റെ ആദ്യ പകുതിയും രണ്ടാം പകുതിയും മോശമായിരുന്നുവെന്നും ഇടയ്ക്ക് ഇടവേള നേരത്ത് കഴിച്ച മുട്ട പഫ്‌സ് നല്ലതായിരുന്നുവെന്നാണ് ഫേസ്ബുക്കില്‍ കമന്റ് വന്നത്.
എന്നാല്‍ തങ്ങളുടെ തീയ്യേറ്ററില്‍ പഫ്‌സ് നല്‍കുന്നില്ലായെന്നായിരുന്നു തീയ്യേറ്റര്‍ അധികൃതര്‍ ഇയാള്‍ക്ക് മറുപടി നല്‍കിയത്. മനഃപൂര്‍വ്വമുള്ള ഡീഗ്രേഡിംഗ് ഒഴിവാക്കാനും തീയ്യേറ്റര്‍ അധികൃതര്‍ പറയുന്നു. ശേഷം ഇവര്‍ ഡീഗ്രേഡ് ചെയ്യാന്‍ ശ്രമിച്ചയാള്‍ക്ക് വേണ്ടി മാത്രം മൂന്ന് മുട്ട പഫ്‌സുകള്‍ തീയ്യേറ്ററില്‍ വെക്കുകയും ചെയ്തു.
ചിത്രത്തിനെതിരെ ആസുത്രിത ആക്രമണമാണ് നടക്കുന്നതെന്ന് സംവിധായകന്‍ ശ്രീകുമാര്‍ മേനോന്‍ നേരത്തെ പറഞ്ഞിരുന്നു. ചിത്രത്തിന്റെ ആദ്യ ഷോയുടെ ക്ലൈമാക്‌സ് ആകുന്നതിന് മുന്‍പ് തന്നെ ചിലര്‍ അതിനെക്കുറിച്ച് കമന്റുകള്‍ സോഷ്യല്‍ മീഡിയയില്‍ ഇട്ടിട്ടുണ്ടെന്നും അദ്ദേഹം ചൂണ്ടിക്കാട്ടി. എന്നാല്‍ പ്രേക്ഷകര്‍ ചിത്രം കാണാന്‍ തീയ്യേറ്ററില്‍ എത്തുമെന്ന് തന്നെയാണ് ശ്രീകുമാര്‍ മേനോന്‍ പറയുന്നത്.
ചിത്രം ആദ്യദിനം ഇന്ത്യയില്‍ നിന്നും 16.48 കോടി രൂപ നേടിയെന്നാണ് അണിയറ പ്രവര്‍ത്തകര്‍ വെളിപ്പെടുത്തുന്നത്. മോഹന്‍ലാലിന് പുറമെ മഞ്ജു വാര്യര്‍, പ്രകാശ് രാജ്, നരേയ്ന്‍, സിദ്ദിഖ്, ഇന്നസെന്റ്, തുടങ്ങിയവരും ചിത്രത്തില്‍ അണിനിരക്കുന്നുണ്ട്.
Discussion about this post