ഒട്ടാവ: എസ്എന്‍സി ലാവലിന്‍ അഴിമതി വിവാദത്തെത്തുടര്‍ന്ന് കനേഡിയന്‍ പ്രധാനമന്ത്രി ജസ്റ്റിന്‍ ട്രൂഡോയുടെ ചീഫ് സെക്രട്ടറി രാജിവെച്ചു. ട്രൂഡോയുടെ പ്രിന്‍സിപ്പല്‍ പ്രൈവറ്റ് സെക്രട്ടറിയായ ജെറാള്‍ഡ് ബട്ട്സ് ആണ് രാജിവെച്ചത്.
ലാവലിന്‍ അഴിമതി വിവാദത്തിലകപ്പെട്ട് കനേഡിയന്‍ മന്ത്രിയും രാജിവെച്ചതും വാര്‍ത്തയായിരുന്നു.എസ്എന്‍സി ലാവലിന്‍ ഗ്രൂപ്പുമായി കരാറിലേര്‍പ്പെടാന്‍ ട്രൂഡോയുടെ ഓഫീസ് നിയമ മന്ത്രിയില്‍ സമ്മര്‍ദ്ദം ചെലുത്തുകയും സഹായങ്ങള്‍ ചെയ്തുവെന്നുമായിരുന്നു സെക്രട്ടറിക്കെതിരെ ഉയര്‍ന്ന ആരോപണം. 2015 ലെ ലിബറല്‍ പാര്‍ട്ടിയുടെ തെരഞ്ഞെടുപ്പ് വിജയത്തിന് ജെറാള്‍ഡ് ബട്ട്സ് വഹിച്ച പങ്ക് ചെറുതല്ല.
ഒക്ടോബറില്‍ തെരഞ്ഞെടുപ്പിന് ഒരുങ്ങുന്ന ജസ്റ്റിന്‍ ട്രൂഡോയ്ക്ക് കനത്ത തിരിച്ചടിയാണ് ബട്ട്‌സിന്റെ രാജി എന്നു പറയാം. കാനഡയിലെ മോണ്‍ട്രിയോള്‍ ആസ്ഥാനമായുള്ള ലാവലിന്‍ കമ്പനിയെ കരിമ്പട്ടികയില്‍ ഉള്‍പ്പെടുത്തുന്നതുള്‍പ്പെടെയുള്ള നടപടികള്‍ക്ക് സര്‍ക്കാര്‍ ഒരുങ്ങവെ ഇതില്‍ നിന്ന് ഒഴിവാക്കാന്‍ പബ്ളിക് പ്രോസിക്യൂഷന്‍സ് ഡയറക്ടര്‍ കാത്ലീന്‍ റോസലിനോട് ആവശ്യപ്പെടാന്‍ അറ്റോര്‍ണി ജനറലായിരുന്ന വില്‍സണുമേല്‍ സമ്മര്‍ദമുണ്ടായെന്ന ‘ഗ്ലോബ് ആന്‍ഡ് മെയില്‍’ പത്രത്തിലെ വാര്‍ത്തയായിരുന്നു സംഭവം പുറത്തുകൊണ്ടു വന്നത്. ആരോപണം പുറത്തുവന്നതിനു പിന്നാലെ മന്ത്രി രാജിവെക്കുകയും ചെയ്തിരുന്നു.
സംഭവത്തില്‍ മന്ത്രിയെയും ജെറാള്‍ഡ് ബട്ട്സിനെയും വിസ്തരിക്കണമെന്ന് പ്രതിപക്ഷം ആവശ്യപ്പെടുന്നതിനിടെയാണ് കുറ്റം നിഷേധിച്ച് രണ്ടുപേരും രാജിവെച്ചിരിക്കുന്നത്.
Discussion about this post