മഹാത്മഗാന്ധിയുടെ 150ാം ജന്മവാർഷികത്തോട് അനുബന്ധിച്ച് പ്രധാനമന്ത്രി നരേന്ദ്രമോദി യു.എ.ഇയിൽ തപാൽ സ്റ്റാമ്പുകൾ പുറത്തിറക്കി. യു.എ.ഇ കിരീടാവകാശി ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ സാന്നിധ്യത്തിലാണ് മഹാത്മഗാന്ധിയുടെ തപാൽ സ്റ്റാമ്പുകൾ പുറത്തിറക്കിയത്.
രാഷ്ട്രപതി കൊട്ടാരത്തിൽ വച്ചാണ് സ്റ്റാമ്പുകൾ പുറത്തിറക്കുന്ന ചടങ്ങ് നടന്നത്. അഹിംസ, ബഹുസ്വരത, സമാധാനം എന്നീ മൂല്യങ്ങൾ ഇന്ത്യയും, യു.എ.ഇയും പങ്കിടുന്നുവെന്ന് വിദേശകാര്യമന്ത്രാലയം വ്യക്തമാക്കി. ലോകത്തെ നയിക്കുന്ന സമാധാനം, സഹിഷ്ണുത, സുസ്ഥിരത എന്നീ മൂല്യങ്ങൾ പിന്തുടർന്ന മഹാത്മഗാന്ധിയുടെ 150ാം ജന്മ വാർഷികം ഈ വർഷം ഇന്ത്യ ആഘോഷിക്കുകയാണ്.
യുഎഇ സഹിഷ്ണുത വർഷം ആഘോഷിക്കുന്നതിനിടയിൽ ഗാന്ധി സ്റ്റാമ്പ് അവതരിപ്പിച്ചത് നമ്മുടെ രാജ്യത്തിന് നൽകുന്ന പ്രത്യേക പ്രാധാന്യത്തെ തുറന്നുകാട്ടുന്നുവെന്ന് ഇന്ത്യൻ വിദേശകാര്യമന്ത്രാലയം അറിയിച്ചു.
Discussion about this post