പോണ്ടിച്ചേരി വാഹന രജിസ്ടേഷന് കേസില് നടനും എംപിയുമായ സുരേഷ് ഗോപിക്കെതിരായ കുറ്റപത്രം കോടതി മടക്കി. ക്രൈംബ്രാഞ്ച് സമര്പ്പിച്ച കുറ്റപത്രമാണ് തിരിച്ച് നല്കിയത്. സാമ്പത്തിക കേസുകള് കൈകാര്യം ചെയ്യുന്ന പ്രത്യേക കോടതിയില് കുറ്റപത്രം സമര്പ്പിക്കാന് തിരുവനന്തചപുരം സിജെഎം കോടതി നിര്ദ്ദേശിച്ചു.
നികുതി വെട്ടിക്കുന്നതിനായി വ്യാജ താമസരേഖകള് നിര്മിച്ചുവെന്നും മൊഴികളെല്ലാം സുരേഷ് ഗോപിക്ക് എതിരാണെന്നും കാണിച്ചാണ് തിരുവനന്തപുരം സിജെഎം കോടതിയില് ക്രൈംബ്രഞ്ച് കുറ്റപത്രം നല്കിയിരുന്നത്. 2010 ലും 2017 ലുമായി സുരേഷ് ഗോപി രണ്ട് ഔഡി കാറുകള് വ്യാജവിലാസത്തില് രജിസ്റ്റര് ചെയ്ത് നികുതി വെട്ടിച്ചുവെന്നായിരുന്നു ക്രൈംബ്രാഞ്ച് കേസ്. നികുതി വെട്ടിക്കാനായി പുതുച്ചേരിയില് താമസിച്ചുവെന്നതിന് സുരേഷ് ഗോപി വ്യാജരേഖകള് ചമച്ചതായും കുറ്റപത്രത്തില് പറയുന്നു.
വ്യാജരേഖ ചമയ്ക്കല്, നികുതി വെട്ടിക്കാനായി മനഃപൂര്വമായ ശ്രമങ്ങള് നടത്തി സര്ക്കാരിന് നഷ്ടമുണ്ടാക്കല്, വഞ്ചന എന്നീ കുറ്റങ്ങളാണ് സുരേഷ് ഗോപിക്കെതിരെ ചുമത്തിയിരിക്കുന്നത്. കുറ്റം തെളിഞ്ഞാല് പരമാവധി ഏഴുവര്ഷംവരെ ശിക്ഷ ലഭിക്കാവുന്ന വകുപ്പുകളാണ് ഇവ.
