തൊടുപുഴ: പൗരത്വ ഭേദഗതി നിയമത്തോടനുബന്ധിച്ച് ബി.ജെ.പി സംഘടിപ്പിച്ച പരിപാടിക്കു മുന്നോടിയായി കടകളടച്ച് പ്രതിഷേധം നടത്തരുതെന്നാവശ്യപ്പെട്ട് കടയുടമകള്ക്ക് നോട്ടീസ് നല്കി പൊലീസ്. തൊടുപുഴ കരിമണ്ണീരിലാണ് കടയുടമകള്ക്ക് നോട്ടീസ് നല്കിയത്.
ബിജെപിയുടെ നേതൃത്വത്തില് ജനജാഗ്രതാ സമിതി എന്ന സംഘടന പൗരത്വ ഭേദഗതി നിയമത്തെ പിന്തുണച്ച് പ്രകടനവും പൊതു സമ്മേളനവും നടത്തുന്നതിനാല് അനുമതിയില്ലാതെ ആ ദിവസം കടകളടച്ച് അപ്രഖ്യാപിത ഹര്ത്താല് നടത്തി ക്രമസമാധാന പ്രശ്നങ്ങള് സൃഷ്ടിക്കരുതെന്നാണ് കരിമണ്ണൂര് സ്റ്റേഷന് സബ് ഇന്സ്പെക്ടര് കടയുടമകള്ക്കയച്ച നോട്ടീസില് പറയുന്നത്. അല്ലാത്ത പക്ഷം കര്ശനമായ നിയമ നടപടികള് സ്വീകരിക്കുമെന്നും നോട്ടീസില് പറയുന്നു.
‘5-ാം തിയ്യതി കരിമണ്ണൂരില് ബിജെപിയുടെ നേതൃത്വത്തില് ജനജാഗ്രതാ സമിതി എന്ന സംഘടന പൗരത്വ ഭേദഗതി നിയമം നടപ്പാക്കുന്നതിനോടനുബന്ധിച്ചുള്ള പ്രകടനവും പൊതു സമ്മേളനവും നടത്തുന്നതായി അറിയുന്നു. ആയതിനോടനുബന്ധിച്ച് മൂന്കൂര് അനുമതിയില്ലാതെ കടകളടച്ച് അപ്രഖ്യാപിത ഹര്ത്താല് നടത്തരുതെന്നും വര്ഗീയ പരമായ ചേരിതിരിവ് സൃഷ്ടിച്ച് ക്രമസമാധാന പ്രശ്നങ്ങള് ഉണ്ടാക്കരുതെന്നും അല്ലാത്ത പക്ഷം കര്ശന നിയമ നടപടി സ്വീകരിക്കുമെന്നു’മാണ് ബുധനാഴ്ച നല്കിയ നോട്ടീസിലുള്ളത്.
നേരത്തെ സമാനമായ രീതിയില് കോഴിക്കോട് കുറ്റ്യാടിയില് ബി.ജെ.പിയുടെ പൗരത്വ നിയമം സംബന്ധിച്ച പരിപാടിക്കെതിരെ പ്രതിഷേധ സൂചകമായി കടകളടച്ചിടാന് ആഹ്വാനം ചെയ്തവര്ക്കെതിരെ കുറ്റ്യാടി പൊലീസ് സ്വമേധയാ കേസെടുത്തിരുന്നു.
Discussion about this post