മെൽബൺ: കൊറോണ ഭീഷണി നിലനിൽക്കുന്ന പശ്ചാത്തലത്തിൽ പ്രാദേശിക- അന്താരാഷ്ട്ര ക്രിക്കറ്റ് മത്സരങ്ങൾ വ്യാപകമായി മാറ്റി വെയ്ക്കപ്പെടുന്നു. ഓസ്ട്രേലിയയും ന്യൂസിലാൻഡും തമ്മിൽ നടന്നു വരുന്ന ക്രിക്കറ്റ് പരമ്പരയിലെ ശേഷിക്കുന്ന മത്സരങ്ങൾ ഇനി ഒരറിയിപ്പ് ഉണ്ടാകുന്നത് വരെ മാറ്റിവെച്ചതായി ക്രിക്കറ്റ് ഓസ്ട്രേലിയ അറിയിച്ചു. പരമ്പര മതിയാക്കി എത്രയും വേഗം നാട്ടിൽ തിരികെ എത്താൻ ന്യൂസിലാൻഡ് ക്രിക്കറ്റ് ബോർഡ് കളിക്കാർക്ക് നിർദ്ദേശം നൽകി. ഓസ്ട്രേലിയക്ക് പുറമെ ന്യൂസിലാൻഡിൽ നടക്കാനിരിക്കുന്ന ഉഭയകക്ഷി ട്വെന്റി20 പരമ്പരയും മാറ്റി വെച്ചതായി ന്യൂസിലാൻഡ് ക്രിക്കറ്റ് ബോർഡും അറിയിച്ചിട്ടുണ്ട്.
ഓസ്ട്രേലിയയുടെയും ന്യൂസിലാൻഡിന്റെയും ചില കളിക്കാർ നിലവിൽ കൊവിഡ് രോഗലക്ഷണങ്ങളെ തുടർന്ന് നിരീക്ഷണത്തിലാണ്. കെയ്ൻ റിച്ചാർഡ്സണ് പുറമെ ലോക്കി ഫെർഗൂസനും ചികിത്സ തേടിയതായാണ് വിവരം.
കൊറോണ ഭീഷണിയുടെ പശ്ചാത്തലത്തിൽ ഇന്ത്യയും ക്രിക്കറ്റ് പരമ്പരകൾ മാറ്റി വെച്ചിരിക്കുകയാണ്. മാർച്ച് 29ന് ആരംഭിക്കാനിരിക്കുന്ന ഐപിഎൽ മത്സരങ്ങൾ ഏപ്രിൽ 15ലേക്ക് മാറ്റിയിട്ടുണ്ട്. മത്സരങ്ങൾ അടച്ചിട്ട സ്റ്റേഡിയങ്ങളിൽ നടത്താനാണ് നിലവിൽ ധാരണയായിരിക്കുന്നത്. ഇന്ത്യയും ദക്ഷിണാഫ്രിക്കയും തമ്മിൽ നടക്കുന്ന ക്രിക്കറ്റ് പരമ്പരയും റോഡ് സേഫ്റ്റി അന്താരാഷ്ട്ര ക്രിക്കറ്റ് ടൂർണമെന്റും മാറ്റി വെച്ചിട്ടുണ്ട്. ഇറാനി ട്രോഫി ക്രിക്കറ്റ് മത്സരങ്ങൾ അടച്ചിട്ട സ്റ്റേഡിയത്തിൽ നടത്താനാണ് ബിസിസിഐ തീരുമാനിച്ചിരിക്കുന്നത്.
Discussion about this post