റിയാദ്: കോവിഡ് 19 ഭീതിക്കിടെയും സൗദി അറേബ്യയ്ക്ക് നേരേ ഹൂതി ഭീകരരുടെ മിസൈല് ആക്രമണം. ഹൂതികള് തൊടുത്ത രണ്ട് ബാലിസ്റ്റിക് മിസൈലുകള് സൗദിയുടെ നേതൃത്വത്തിലുള്ള സഖ്യസേന തകര്ത്തതായും അത്യാഹിതങ്ങളില്ലെന്നും ഔദ്യോഗിക വാര്ത്താ ഏജന്സി റിപ്പോര്ട്ട് ചെയ്തു.ശനിയാഴ്ച രാത്രി 11 മണിയോടെയാണ് മിസൈല് ആക്രമണമുണ്ടായത്. അതേസമയം, ആക്രമണത്തിന്റെ ഉത്തരവാദിത്തം ഇതുവരെ ആരും ഏറ്റെടുത്തിട്ടില്ല. തലസ്ഥാനമായ റിയാദും തെക്കന് നഗരമായ ജിസാനും ലക്ഷ്യമാക്കിയാണ് ഹൂതികള് ആക്രമണം നടത്തിയത്.
യുഎസ് മിസൈല് പ്രതിരോധ സംവിധാനങ്ങള് ഉപയോഗിച്ചാണ് സൗദി സഖ്യ സേന ആക്രമണം ചെറുത്തതെന്ന് സൗദി ടെലിവിഷനായ അല്അറേബ്യ റിപ്പോര്ട്ട് ചെയ്തു. ഹൂതി വിമതരാണ് ആക്രമണത്തിന് പിന്നിലെന്നും മിസൈല് തകര്ത്തതിന്റെ അവശിഷ്ടങ്ങള് ചില ജനവാസമേഖലകളില് വീണതായും സഖ്യസേന വക്താവ് കേണല് തുര്ക്കി അല് മാലിക്കിയും അറിയിച്ചു.
രാത്രി മൂന്ന് തവണ സ്ഫോടനശബ്ദം കേട്ടതായും പിന്നാലെ പോലീസ് വാഹനങ്ങള് സൈറണ് മുഴക്കി പോയതായും റിയാദിലെ താമസക്കാര് പറഞ്ഞതായി അല്ജസീറയും റിപ്പോര്ട്ട് ചെയ്തു.
കൊറോണ വൈറസ് വ്യാപനത്തിന്റെ പശ്ചാത്തലത്തില് ലോകത്ത് എല്ലായിടത്തും ആക്രമണം അവസാനിപ്പിക്കണമെന്നും വെടിനിര്ത്തല് പാലിക്കണമെന്നും യു.എന്. നേരത്തെ ആഹ്വാനം ചെയ്തിരുന്നു. യെമനിലെ എല്ലാ പാര്ട്ടികളും ഇതിനെ പിന്തുണയ്ക്കുകയും ചെയ്തു. എന്നാല് ഇതിനുപിന്നാലെയാണ് സൗദിയെ ലക്ഷ്യമാക്കി ആക്രമണമുണ്ടായത്.
Discussion about this post