ഇന്ത്യയുടെയും പാകിസ്താന്റെയും സാമ്പത്തിക പ്രതിസന്ധി മറികടക്കാൻ നിർദേശവുമായി മുൻ പാക് ക്രിക്കറ്റ് താരം ഷോയിബ് അക്തർ. ഇരുരാജ്യങ്ങളും കനത്ത സാമ്പത്തിക പ്രതിസന്ധിയിലായ കോവിഡ് മഹാമാരിയെ തുടർന്ന്, ഫണ്ട് ശേഖരിക്കാൻ ക്രിക്കറ്റ് പരമ്പര നടത്തണമെന്നാണ് അക്തർ നിർദ്ദേശിച്ചത്. മൂന്ന് മത്സരങ്ങൾ ഉൾപ്പെടുന്ന ത്രിദിന ക്രിക്കറ്റ് പരമ്പരയാണ് അക്തർ മുന്നോട്ടു വെക്കുന്ന ആശയം.
എക്കാലത്തും ഒട്ടേറെ ആരാധകരുണ്ടായിരുന്ന ഇന്ത്യ-പാകിസ്ഥാൻ മത്സരങ്ങൾ നിർത്തലാക്കിയിട്ട് ഒരു പതിറ്റാണ്ടിലധികമായി. പാകിസ്ഥാൻ കേന്ദ്രീകരിച്ചുള്ള ഭീകരസംഘടനകൾ ഇന്ത്യയ്ക്കെതിരെ നടത്തുന്ന തീവ്രവാദ പ്രവർത്തനങ്ങൾ മൂലം, 2007ന് ശേഷം ഇന്ത്യ-പാകിസ്ഥാൻ ഉഭയകക്ഷി പരമ്പരകൾ നടന്നിട്ടില്ല. ആകപ്പാടെ ഐസിസി ടൂർണ്ണമെന്റുകളിലും ഏഷ്യാകപ്പിലും മാത്രമാണ് ഇതിന് അപവാദമായി മത്സരങ്ങൾ നടത്താറ്.വൈറസ് വ്യാപനത്തിന്റെ പശ്ചാത്തലത്തിൽ അടച്ചിട്ട സ്റ്റേഡിയത്തിൽ കളി നടത്താവുന്നതേയുള്ളൂവെന്നും അക്തർ പറഞ്ഞു.വരുമാനം എത്രയാണെങ്കിലും ഇരുരാജ്യങ്ങൾക്കും തുല്യമായി വീതിയ്ക്കാവുന്നതാണെന്നും അദ്ദേഹം ചൂണ്ടിക്കാട്ടി.ഇത് തന്റെ അഭിപ്രായമാണെന്നും ഇക്കാര്യത്തിൽ അന്തിമ തീരുമാനമെടുക്കേണ്ടത് സർക്കാറുകളാണെന്നും അക്തർ വ്യക്തമാക്കി.
