ബിജെപി സംസ്ഥാന കമ്മറ്റി ഓഫിസില് നിന്ന് മുന് സംസ്ഥാന പ്രസിഡണ്ട് കുമ്മനം രാജശേഖരനെ പുറത്താക്കി എന്ന വ്യാജവാര്ത്ത നല്കി സിപിഎം ന്യൂസ് ചാനലായ കൈരളി പീപ്പിള്. പാര്ട്ടി ഓഫിസിലെ മുറിയില് നിന്ന് കുമ്മനത്തെ ഒഴിവാക്കിയെന്നും, പകരം മറ്റൊരാളാണ് അവിടെ താമസിക്കുന്നതെന്നും ആയിരുന്നു പീപ്പിളിന്റെ നുണ വാര്ത്ത.
ലോക്ഡൗണ് പ്രഖ്യാപിക്കുന്നതിന് മുന്പ് മാര്ച്ച് 14 ന് കുമ്മനം രാജശേഖരന് ചികിത്സയ്ക്കായി പന്തളത്തെ ചാങ്ങേത്ത് ആയുര്വേദ ആശുപത്രിയില് പ്രവേശിച്ചിരുന്നു, രണ്ടാഴ്ചത്തെ ചികിത്സ കഴിഞ്ഞതോടെ ലോക്ഡൗണ് പ്രഖ്യാപിക്കപ്പെട്ടതിനാല് ചികിത്സയ്ക്ക് ശേഷമുള്ള വിശ്രമവും അവിടെത്തന്നെയാക്കി. ഈ അവസരം മംുതലെടുത്ത് തെറ്റായ വാര്ത്ത നല്കുകയായിരുന്നു സിപിഎം മാധ്യമം എന്നാണ് വിശദീകരണം.
തന്നോട് ഒന്ന് നേരിട്ട് വിളിച്ചു ചോദിച്ചാല് അറിയാവുന്ന കാര്യമേ ഉണ്ടായിരുന്നുള്ളു, ലോക് ഡൗണിന് ശേഷം താന് തിരുവനന്തപുരത്ത് മടങ്ങിയെത്തിയാല് വാര്ത്ത തിരുത്തി നല്കുമെന്ന് പ്രതീക്ഷിക്കുന്നുവെന്നും കുമ്മനം പ്രതികരിച്ചു. ഇത്തരമൊരു വാര്ത്ത പ്രസിദ്ധീകരിച്ചത് തരംതാണ മാധ്യമ പ്രവര്ത്തനമായി പോയെന്നും കുമ്മനം പറഞ്ഞു
കുമ്മനം രാജശേഖരന്റെ വിശദീകരണം-
ബിജെപി സംസ്ഥാന കമ്മിറ്റി ഓഫീസില് നിന്ന് എന്നെ പുറത്താക്കി എന്ന തരത്തില് ഇടത് വാര്ത്താ ചാനലായ പീപ്പിള് ടിവി ഒരു വാര്ത്ത പ്രക്ഷേപണം ചെയ്തതായി ചിലര് ശ്രദ്ധയില് പെടുത്തുകയുണ്ടായി. ഈ വാര്ത്ത ലേഖകന്റെ ഭാവനാ സൃഷ്ടി മാത്രമാണെന്ന് ആദ്യമേ പറയട്ടെ.
ലോക്ഡൗണ് പ്രഖ്യാപിക്കുന്നതിന് മുന്പ് മാര്ച്ച് 14 ന് തന്നെ ചികിത്സാര്ത്ഥം പന്തളത്തെ ചാങ്ങേത്ത് ആയുര്വേദ ആശുപത്രിയില് പ്രവേശിച്ചതാണ്. രണ്ടാഴ്ചത്തെ ചികിത്സ കഴിഞ്ഞതോടെ ലോക്ഡൗണ് പ്രഖ്യാപിക്കപ്പെട്ടതിനാല് ചികിത്സയ്ക്ക് ശേഷമുള്ള വിശ്രമവും ഇവിടെത്തന്നെയാക്കി.
ഇപ്പോള് ചെങ്ങന്നൂരിലെ കാര്യാലയത്തില് വിശ്രമത്തിലാണ്. ഇക്കാര്യങ്ങളൊക്കെ എന്നോട് നേരിട്ട് ചോദിച്ചാല് അറിയാവുന്നതേ ഉള്ളൂ. എന്നിട്ടും ഇത്തരമൊരു വാര്ത്ത പ്രസിദ്ധീകരിച്ചത് തരംതാണ മാധ്യമ പ്രവര്ത്തനമായി പോയെന്ന് ഖേദത്തോടെ പറയട്ടെ.
എന്റെ പ്രവര്ത്തന കേന്ദ്രം ഇപ്പോഴും തിരുവനന്തപുരം തന്നെയാണ്.
ബിജെപി ഓഫീസ് ആണ് എന്റെ കുടുംബ വീട്. സംസ്ഥാന പ്രസിഡന്റാണ് കുടുംബ നാഥന്.
ലോക്ഡൗണ് കഴിഞ്ഞാല് ഉടന് തന്നെ അവിടേക്ക് മടങ്ങിയെത്തുകയും ചെയ്യും. അപ്പോഴെങ്കിലും ഇപ്പോഴത്തെ വാര്ത്ത തിരുത്തി നല്കുമെന്ന് പ്രതീക്ഷിക്കുന്നു.
