ഡൽഹി: കൊവിഡ് ബാധയുടെ പശ്ചാത്തലത്തിൽ രാജ്യത്ത് പ്രഖ്യാപിച്ചിരിക്കുന്ന ലോക്ക് ഡൗൺ നീട്ടുന്നതുമായി ബന്ധപ്പെട്ട് പ്രധാനമന്ത്രി നരേന്ദ്ര മോദി ഇന്ന് രാജ്യത്തെ അഭിസംബോധന ചെയ്യും. രാത്രി 8.00 മണിക്കാണ് അദ്ദേഹം രാജ്യത്തെ ജനങ്ങളെ അഭിസംബോധന ചെയ്യുകയെന്ന് പ്രധാനമന്ത്രിയുടെ ഓഫീസ് ട്വിറ്ററിലൂടെ അറിയിച്ചു.
Shri @narendramodi will be addressing the nation at 8 PM this evening.
— PMO India (@PMOIndia) May 12, 2020
ലോക്ക് ഡൗൺ നീട്ടുന്നതുമായി ബന്ധപ്പെട്ട് കഴിഞ്ഞ ദിവസം അദ്ദേഹം സംസ്ഥാന മുഖ്യമന്ത്രിമാരുമായി വീഡിയോ കോൺഫറൻസിംഗ് വഴി ചർച്ച നടത്തിയിരുന്നു. സാമ്പത്തിക രംഗം തുറക്കുന്നതിനുള്ള പരിശ്രമങ്ങളിലാണ് താനെന്ന് അദ്ദേഹം ചർച്ചയ്ക്കിടെ വ്യക്തമാക്കിയിരുന്നു.
കർശന നിയന്ത്രണങ്ങൾ തുടരുമെന്നും എന്നാൽ ചില മേഖലകളിൽ നിയന്ത്രണ വിധേയമായി ഇളവുകൾ നൽകുമെന്നും അദ്ദേഹം സൂചിപ്പിച്ചിരുന്നു. കൊവിഡിനെതിരായ പോരാട്ടത്തിൽ സാമൂഹിക അകലം പാലിക്കുന്നതാണ് ഏറ്റവും ശക്തമായ ആയുധമെന്നും പ്രധാനമന്ത്രി വ്യക്തമാക്കിയിരുന്നു. എന്നാൽ, ലോക്ക് ഡൗൻ ഒന്നാം ഘട്ടത്തിലെ നിയന്ത്രണങ്ങൾ തുടർന്നുള്ള ഘട്ടങ്ങളിൽ ആവശ്യമായി വന്നേക്കില്ലെന്നും അദ്ദേഹം പറഞ്ഞു.
അതേസമയം രാജ്യത്ത് ലോക്ക് ഡൗൺ നീട്ടിയേക്കുമെന്നും എന്നാൽ നിയന്ത്രണങ്ങള് തീരുമാനിക്കാനുള്ള അവകാശം സംസ്ഥാനങ്ങള്ക്ക് നൽകിയേക്കുമെന്നാണ് സൂചന. മഹാരാഷ്ട്രാ, തമിഴ്നാട്, പഞ്ചാബ്, ബിഹാര്, ആസാം, തെലങ്കാന, പശ്ചിമ ബംഗാള്, ഡല്ഹി തുടങ്ങിയ സംസ്ഥാനങ്ങൾ ലോക്ക് ഡൗൺ നീട്ടണമെന്ന് ആവശ്യപ്പെട്ടിരുന്നു.
Discussion about this post