കണ്ണൂർ: സിപിഎം നിയന്ത്രണത്തിലുള്ള കണ്ണൂർ എകെജി സഹകരണ ആശുപത്രിയിൽ പരസ്യമായ ലോക്ക് ഡൗൺ ലംഘനം. ബസിൽ ആകെ ഉള്ള സീറ്റിന്റെ പകുതി സീറ്റിൽ മാത്രമേ ആളുകൾ യാത്ര ചെയ്യാവൂ എന്ന നിർദ്ദേശം നിലനിൽക്കെ, ആശുപത്രിയിലേക്ക് നൂറിലധികം ജീവനക്കാരെ കുത്തിനിറച്ച് യാത്ര ചെയ്യുന്നതിന്റെ ചിത്രങ്ങൾ പുറത്ത്.
ലോക്ക് ഡൗൺ മാർഗ്ഗനിർദ്ദേശങ്ങൾ പ്രകാരം നാൽപത് സീറ്റുള്ള ബസ്സിൽ ഇരുപതിൽ താഴെ ആളുകൾക്ക് മാത്രമേ യാത്രചെയ്യാൻ അനുമതിയുള്ളൂ. എന്നാൽ ബസ്സിന്റെ എല്ലാ സീറ്റുകളിലും ജീവനക്കാർ ഇരുന്ന് യാത്ര ചെയ്തതിന് പുറമെ ഇരട്ടിയിലധികം ജീവനക്കാർ നിന്നും യാത്ര ചെയ്തു. പട്ടാപ്പകൽ പൊലീസ് നോക്കി നിൽക്കെയായിരുന്നു ദിവസങ്ങളായി തുടരുന്ന ഈ ചട്ടലംഘനം. കഴിഞ്ഞ മൂന്ന് ദിവസമായി ഇങ്ങനെയാണ് യാത്ര ചെയ്തതെന്ന് ഡ്രൈവർ പറയുന്നു.
ഇതു പോലെയുള്ള പ്രവർത്തനങ്ങൾ കൊവിഡ് പ്രതിരോധ പ്രവർത്തനങ്ങൾക്ക് വലിയ വെല്ലുവിളിയാണെന്ന് ജില്ലാ മെഡിക്കൽ ഓഫീസർ വ്യക്തമാക്കി. സാമൂഹിക അകലം പാലിക്കുന്നതിനെക്കുറിച്ചും വാഹന യാത്രാ നിയന്ത്രണങ്ങളെക്കുറിച്ചും സംസ്ഥാനത്തെ ജനങ്ങൾക്ക് ദിവസേന മുന്നറിയിപ്പ് നൽകുന്ന മുഖ്യമന്ത്രിയുടെ സ്വന്തം നാട്ടിലെ പരസ്യമായ ഈ നിയമലംഘനം വലിയ പ്രതിഷേധങ്ങൾക്ക് വഴി വെക്കുമെന്നാണ് സൂചന.
Discussion about this post