ഡൽഹി: നിസാമുദ്ദീനിലെ വിവാദമായ തബ്ലീഗ് ജമാ അത്ത് മതസമ്മേളനത്തിൽ പങ്കെടുത്ത 536 വിദേശികൾക്കെതിരെ കുറ്റപത്രം സമർപ്പിക്കാനൊരുങ്ങി ഡൽഹി പൊലീസ്. സാകേത് കോടതിയിലാണ് കുറ്റപത്രം സമർപ്പിക്കുന്നത്. മൂന്ന് വ്യത്യസ്ത രാജ്യങ്ങളിൽ നിന്നുള്ളവരാണ് ഈ 536 പേർ.
വിസാ ചട്ട ലംഘനം, പകർച്ച വ്യാധി നിരോധന നിയമ ലംഘനം, നിരോധനാജ്ഞ ലംഘനം എന്നീ വകുപ്പുകളാണ് ഇവർക്കെതിരെ ചുമത്തിയിരിക്കുന്നത്. പ്രതികൾ ലാഘവത്വത്തോടെ പെരുമാറിയെന്നും അതു വഴി ജനങ്ങളുടെ ജീവന് ഹാനികരമായ പകർച്ചവ്യാധിയുടെ വ്യാപനത്തിന് ഹേതുവായെന്നും കുറ്റപത്രത്തിൽ പറയുന്നു. അതിനാൽ ഇവർ ഇന്ത്യൻ ശിക്ഷാ നിയമത്തിലെ 269ആം വകുപ്പ് പ്രകാരം ശിക്ഷാർഹരാണെന്നും കുറ്റപത്രത്തിൽ ആരോപിക്കുന്നു.
പ്രതികൾ ക്വാറന്റീൻ ലംഘനം നടത്തിയെന്നും അതിനാൽ ഇന്ത്യൻ ശിക്ഷാ നിയമത്തിലെ 271 വകുപ്പ് പ്രകാരമുള്ള ശിക്ഷയും ഇവർക്ക് നൽകണമെന്നും ഡൽഹി പൊലീസ് കുറ്റപത്രത്തിൽ വിശദീകരിക്കുന്നു.
