ആതന്‍സ്: യൂറോപ്യന്‍ യൂണിയന്റെ സഹായം സ്വീകരിക്കുന്ന വിഷയത്തില്‍ പാര്‍ട്ടിയിലുണ്ടായ ഭിന്നതയെത്തുടര്‍ന്ന് ഗ്രീസ് പ്രധാനമന്ത്രി അലക്‌സിസ് സിപ്രസ് രാജിവെച്ചു. ഇതുമായി ബന്ധപ്പെട്ട കത്ത് പ്രസിഡന്റിന് ഉടന്‍ കൈമാറും ഇതോടെ രാജ്യത്ത് അടുത്തമാസം ഇടക്കാല തിരഞ്ഞെടുപ്പിന് കളമൊരുങ്ങി. എല്ലാം ഇനി ജനങ്ങളുടെ കയ്യിലാണെന്നും അവരുടെ വോട്ട് കാര്യങ്ങളെ തീരുമാനിക്കുമെന്നും സിപ്രസ് പറഞ്ഞു. സപ്തംബര്‍ 20ന് തിരഞ്ഞെടുപ്പുണ്ടായേക്കുമെന്നാണ് സൂചന.
പുരോഗമന ഇടതുപക്ഷ സഖ്യമായ സിറിസയുടെ നേതാവ് അലക്‌സിസ് സിപ്രസ് ജനുവരിയിലാണ് പ്രധാനമന്ത്രിയായി അധികാരത്തില്‍ എത്തിയത്.
കടുത്ത സാമ്പത്തികപ്രതിസന്ധിയിലായ ഗ്രീസിന് ഉപാധികളോടെ യൂറോപ്യന്‍ യൂണിയന്‍ രക്ഷാപാക്കേജ് പ്രഖ്യാപിച്ചിരുന്നു.
പൊതുമേഖലാസ്ഥാപനങ്ങളുടെ ചെലവുചുരുക്കല്‍, പെന്‍ഷന്‍ പരിഷ്‌കരണം തുടങ്ങിയ ഉപാധികളാണ് മുന്നോട്ടുവെച്ചത്. ഇതിന്റെ ഭാഗമായി മൂന്നുവര്‍ഷം കൊണ്ട് 8,600 കോടി പൗണ്ട് (ഏകദേശം 8,82,500 കോടി രൂപ) യൂറോപ്യന്‍ യൂണിയന്‍ ഗ്രീസിന് നല്‍കും. ആദ്യഗഡുവായ 1,300 കോടി പൗണ്ട് (1,33,400 കോടി രൂപ) വ്യാഴാഴ്ച ഗ്രീസിന് ലഭിക്കുകയും ചെയ്തു.
യൂറോപ്യന്‍ സെന്‍ട്രല്‍ ബാങ്കില്‍നിന്ന് വായ്പയെടുത്ത ഏകദേശം 3,200 കോടി പൗണ്ട് (ഏകദേശം 32,800 കോടി രൂപ) തിരിച്ചടയ്ക്കാന്‍ ഇതിലൂടെ സാധിക്കും. എന്നാല്‍, ഉപാധികളോടെ രക്ഷാപദ്ധതി സ്വീകരിച്ചതിനെതിരെ ഭരണകക്ഷിയായ സിരിസ പാര്‍ട്ടിയിലെ ഒരുവിഭാഗം രംഗത്തുവന്നു. രക്ഷാപദ്ധതിക്ക് അംഗീകാരം നല്‍കാന്‍ കഴിഞ്ഞ വെള്ളിയാഴ്ച പാര്‍ലമെന്റ് സമ്മേളനം വിളിച്ചിരുന്നു.
പാര്‍ട്ടിക്കുള്ള 149 പാര്‍ലമെന്റ് അംഗങ്ങളില്‍ 43 പേരും ഉപാധികളോടെ പദ്ധതി സ്വീകരിക്കുന്നതിനെതിരെ വോട്ടുചെയ്തു. ഇതോടെയാണ് രാജിവെച്ച് തിരഞ്ഞെടുപ്പിനെ നേരിടാന്‍ സിപ്രസ് തീരുമാനമെടുത്തത്.
കഴിഞ്ഞ ദിവസം നടന്ന വോട്ടെടുപ്പില്‍ 300 അംഗ പാര്‍ലമെന്റില്‍ യൂറോ അനുകൂല പ്രതിപക്ഷത്തിന്റെ പിന്തുണയോടെ 222 വോട്ട് നേടിയാണു ബില്‍ പാസാക്കിയത്. പ്രധാനമന്ത്രി അലക്‌സിസ് സിപ്രസിന്റെ പാര്‍ട്ടിയായ സിറീസയിലെ ഒരുവിഭാഗം അടക്കം 43 അംഗങ്ങള്‍ എതിര്‍ത്ത് വോട്ടു ചെയ്യുകയോ വിട്ടുനില്‍ക്കുകയോ ചെയ്തിരുന്നു.
Discussion about this post