തിരുവനന്തപുരം: സ്വര്ണ്ണക്കള്ളക്കടത്തു കേസില് കസ്റ്റംസ് അന്വേഷിക്കുന്ന സ്വപ്ന സുരേഷിനെ സംരക്ഷിക്കുന്നത് സിപിഎം ആണെന്ന് ബിജെപി അധ്യക്ഷന് കെ.സുരേന്ദ്രന്. അവര് എവിടെയുണ്ടെന്ന് പോലീസിനറിയാം. ഒളിവിലിരുന്ന് ചാനലില് ശബ്ദരേഖ എത്തിക്കാനുള്ള സൗകര്യം ചെയ്തു കൊടുക്കുന്നത് സിപിഎമ്മാണ്. സര്ക്കാരിനും മുഖ്യമന്ത്രിക്കും ഇപ്പോഴുള്ള വിവാദത്തില് പിടിച്ചു നില്ക്കാനുള്ള സഹായമാണ് സ്വപ്ന സുരേഷ് ചെയ്യുന്നത്. തനിക്ക് സഹായം ചെയ്യുന്നവരെ തിരിച്ചും സഹായിക്കുന്നു എന്ന നയമാണ് ശബ്ദരേഖയിലൂടെ അവര് ചെയ്തിരിക്കുന്നത്. കസ്റ്റംസ് അന്വേഷിക്കുന്ന ഒരാള് ഒളിവിലിരുന്ന് അന്വേഷണത്തെ വഴിതിരിച്ചുവിടുന്നു. അവരെ ഇപ്പോഴും സഹായിക്കുന്നവരെ കുറിച്ചുള്ള വിവരങ്ങളും പുറത്തു വരണമെന്ന് സുരേന്ദ്രന് പറഞ്ഞു.
സ്വപ്നയുടെ ശബ്ദരേഖ മാധ്യമങ്ങള്ക്ക് ലഭിച്ചത് സംബന്ധിച്ച് പ്രതികരിക്കുകയായിരുന്നു സുരേന്ദ്രന്. സ്വര്ണക്കടത്തുമായി തനിക്ക് ബന്ധമില്ലെന്നും കുടുംബം ഒന്നടങ്കം ആത്മഹത്യയുടെ വക്കിലാണെന്നും ചാനലുകള്ക്ക് നല്കിയ ശബ്ദരേഖയില് പറയുന്നു. എനിക്ക് ആകെക്കൂടിയുള്ള ഒരേയൊരു ഇന്വോള്വ്മെന്റ് ഡിപ്ലോമാറ്റിക് കാര്ഗോയില് ആ എ.സി. അദ്ദേഹത്തെ വിളിച്ച് സംസാരിച്ച് അതൊന്നു ക്ലിയര് ചെയ്യണേ എന്നു പറഞ്ഞു. പിന്നീടുണ്ടായ ഒരു സംഭവത്തിനും ഞാന് സാക്ഷിയല്ല. ഇത് ജനങ്ങള് അറിയണം. ഇത്രയും എന്നെ, ഞാനെന്ന സ്ത്രീയെ, ഞാന് എന്ന അമ്മയെ ഇത്രയും ഫ്രെയിം ചെയ്ത് മുഖ്യമന്ത്രിയും സ്പീക്കറും ബാക്കിയുള്ള പൊളിറ്റീഷ്യന്സിനെയും ചേര്ത്തുവെച്ച് എന്നെ പറഞ്ഞു. എന്നെ ഞാന് അല്ലാതെ ആക്കി. എന്നെയും എന്റെ കുടുംബത്തെയും ആത്മഹത്യയുടെ വക്കില് കൊണ്ടു നിര്ത്തി. ഒരു മുഖ്യമന്ത്രിക്കോ ഇവിടെ ഇപ്പോ ഭരിച്ചു കൊണ്ടിരിക്കുന്ന ഒരു മന്ത്രിമാര്ക്കോ ഒരു സ്പീക്കര്ക്കോ അഞ്ച് സംസ്ഥാനങ്ങളില് പോലുമോ ആരെയും ബാധിക്കില്ല. നിങ്ങള് വിചാരിക്കുന്നതെല്ലാം തെറ്റാണ്. ഇതൊന്നും ആരെയും ബാധിക്കാന് പോകുന്നില്ല. അവര് പറഞ്ഞു.
Discussion about this post