ജമ്മു കശ്മീരിലെ ലേയിലുള്ള കുഷോക് ബാകുല റിംബോച്ചെ എയർപോർട്ടിന്റെ സുരക്ഷാ ചുമതല ഏറ്റെടുത്ത് സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്സ്. എയർപോർട്ടിൽ സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്സിന്റെ (സിഐഎസ്എഫ്)180 ഓളം ഉദ്യോഗസ്ഥരെയാണ് വിന്യസിച്ചിട്ടുള്ളത്.ഡെപ്യൂട്ടി കമാൻഡർ റാങ്ക് ഓഫീസറായിരിക്കും ഈ യൂണിറ്റിനെ നിയന്ത്രിക്കുക.പടിഞ്ഞാറൻ ഹിമാലയനിരകളിലെ ലഡാക്കിൽ സ്ഥിതിചെയ്യുന്ന കുഷോക് ബാകുല റിംബോച്ചെ എയർപോർട്ട് ലഡാക്കിലെത്തന്നെ പ്രധാന എയർപോർട്ട് ആണ്.
ശീതകാലത്ത് എല്ലാ വഴികളും മഞ്ഞുമൂടി അടഞ്ഞു കിടക്കുമ്പോൾ ലഡാക്കിലേക്കുള്ള ഒരേയൊരു പ്രവേശന കവാടം ഈ എയർപോർട്ട് ആയിരിക്കും.രാജ്യത്ത് ഏറ്റവും കൂടുതൽ സഞ്ചാരികൾ എത്തിച്ചേരുന്ന എയർപോർട്ടുകളിൽ മുൻനിരയിലുള്ള എയർപോർട്ടാണ് കുഷോക് ബാകുല റിംബോച്ചെ എയർപോർട്ട്.ഇന്ത്യയിലേറ്റവും ഉയരത്തിൽ സ്ഥിതി ചെയ്യുന്ന ഈ എയർപോർട്ടിന്റെ സുരക്ഷാ ചുമതല സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്സിനെ ഏൽപ്പിക്കുന്ന ചടങ്ങിന്റെ വിശിഷ്ടാതിഥി സിഐഎസ്എഫിന്റെ ഡയറക്ടർ ജനറലായ രാജേഷ് രഞ്ജനായിരുന്നു.
Discussion about this post