ന്യൂഡൽഹി : ബംഗാൾ ഉൾക്കടലിൽ ന്യൂനമർദ്ദം രൂപപ്പെട്ടതായി കേന്ദ്ര കാലാവസ്ഥ വകുപ്പ്.ആന്ധ്രാ തീരത്ത് രൂപം കൊണ്ട ന്യൂനമർദ്ദത്തിന്റെ സ്വാധീനഫലമായി അതിശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥ വകുപ്പ് കേരളത്തിന് മുന്നറിയിപ്പു നൽകി.നാളെ ന്യൂനമർദ്ദം ആന്ധ്രാ തീരത്ത് എത്തും. അതിശക്തമായ മഴ ഒഡീഷയിലും ആന്ധ്രയുടെ തീരത്തും ഉണ്ടാകും.തുടർന്ന് ന്യൂനമർദ്ദം തെലങ്കാനയിലൂടെ ഗുജറാത്തിലേക്ക് കടക്കുന്നതിന്റെ ഫലമായി വരും ദിവസങ്ങളിൽ ഈ സംസ്ഥാനങ്ങളിലും ശക്തമായ മഴ ലഭിക്കാനിടയുണ്ട്.
അറബിക്കടലിൽ മഹാരാഷ്ട്രാ തീരത്തിന് സമീപം ചുഴലിക്കാറ്റിനുള്ള സാധ്യതയും കാണുന്നുണ്ട്.ശക്തമായ മഴയിൽ മഹാരാഷ്ട്ര തീരം മുതൽ കേരളം വരെയുള്ള പ്രദേശങ്ങളിൽ തിരമാല ഉയരാനിടയുണ്ട്. ഇതിന്റെ സ്വാധീനഫലമായി വരും ദിവസങ്ങളിൽ രാജ്യത്തിന്റെ പടിഞ്ഞാറൻ മേഖലയിൽ ശക്തമായ മഴ ലഭിക്കും. ഒറ്റപ്പെട്ട കനത്ത മഴയ്ക്കുള്ള സാധ്യതയുമുണ്ട്.കാലാവസ്ഥ വകുപ്പ് കേരളം, കർണാടക, കൊങ്കൺ തീരങ്ങളിൽ അതീവ ജാഗ്രതാ നിർദ്ദേശം നൽകിയിട്ടുണ്ട്.
