ഇന്ത്യക്കെതിരെ വ്യാജവാർത്തകൾ നൽകി ആഗോള തലത്തിലെ ഇന്ത്യയുടെ പ്രതിച്ഛായ തകർക്കാൻ നീക്കം. ഇതിനായി കശ്മീർ വിഘടനവാദികളെ തുർക്കി വിലക്കെടുക്കുന്നതായാണ് വിവരം. കശ്മീരിൽ ഇന്ത്യ മനുഷ്യാവകാശ ലംഘനം നടത്തുകയാണെന്ന തരത്തിൽ തുർക്കിഷ് മാധ്യമത്തിൽ കഴിഞ്ഞ ഓഗസ്റ്റ് 15ന് വാർത്ത വന്നിരുന്നു. ലേഖനം തയ്യാറാക്കിയ റുവാ ഷാ, കശ്മീർ വിഘടനവാദി നേതാവ് അൽതാഫ് അഹമ്മദ് ഷായുടെ മകളാണ്. കശ്മീരിൽ തീവ്രവാദം പരിപോഷിപ്പിക്കുന്നതിന് വിദേശ ഫണ്ട് സ്വീകരിക്കുകയും ഹവാല ഇടപാടുകൾ നടത്തുകയും ചെയ്തതിന് 2017ൽ എൻ ഐ എ അൽതാഫിനെതിരെ കേസ് രജിസ്റ്റർ ചെയ്തിരുന്നു.
ആഗോള തലത്തിൽ ഇന്ത്യക്ക് ലഭിച്ചു കൊണ്ടിരിക്കുന്ന സ്വീകാര്യത തകർക്കുക എന്നതാണ് തുർക്കിയുടെ ലക്ഷ്യം. ഇതിനായി കശ്മീർ വിഘടവാദികളെ മാത്രമല്ല, പാകിസ്ഥാൻ മാധ്യമ പ്രവർത്തകരെയും തുർക്കി ഉപയോഗിക്കുന്നുണ്ട്. ഇസ്ലാമിക രാഷ്ട്രീയം ലോകത്ത് ആകമാനം വ്യാപിപ്പിക്കുക എന്ന പ്രഖ്യാപിത ലക്ഷ്യത്തോടെയാണ് എർദോഗൻ നീങ്ങുന്നത് എന്നത് വ്യക്തമാക്കുന്ന നടപടികളാണ് ഇതിലൂടെ വെളിപ്പെടുന്നത്.
തുർക്കിഷ് മാധ്യമങ്ങളായ അനദോളു, ടി ആർ ടി എന്നിവയിൽ ഇന്ന് ഏറ്റവും കൂടുതൽ ജോലി ചെയ്യുന്നത് പാകിസ്ഥാനി മാധ്യമ പ്രവർത്തകരാണ്. എന്നാൽ നേരത്തെ അമേരിക്കൻ-ബ്രിട്ടീഷ് മാദ്ധ്യമ പ്രവർത്തകരായിരുന്നു ഇവയിൽ കൂടുതലായി പ്രവർത്തിച്ചിരുന്നത്. തീവ്ര ഇസ്ലാമിക ചിന്തയുള്ള മാധ്യമപ്രവർത്തകരെ തിരഞ്ഞു പിടിച്ച് ജോലി ഏൽപ്പിക്കുന്ന തുർക്കിയുടെ നടപടി മാധ്യമ രംഗത്തെ ഇസ്ലാമികവത്കരണത്തിന്റെ ഏറ്റവും ഭീകരമായ മുഖമായി വിലയിരുത്തപ്പെടുന്നു. പാകിസ്ഥാനും തുർക്കിക്കും അനുകൂലമായ വാർത്താ അന്തരീക്ഷം സൃഷ്ടിച്ച് ഇടഞ്ഞു നിൽക്കുന്ന സൗദി അടക്കമുള്ള പ്രബല ഇസ്ലാമിക രാജ്യങ്ങളെ തങ്ങളുടെ പക്ഷത്ത് ചേർത്ത് നിർത്താനുള്ള ശ്രമങ്ങളുടെ ഭാഗമായാണ് ഇത് വിലയിരുത്തപ്പെടുന്നത്.
തുർക്കിയിലെ വലിയൊരു വിഭാഗം ജനങ്ങളും സ്വതന്ത്ര ചിന്താഗതിക്കാരും മത ധ്രുവീകരണത്തിൽ താത്പര്യം പ്രകടിപ്പിക്കാത്തവരുമാണ്. എന്നൽ ഇവരെക്കൂടി മതത്തിന്റെ ചട്ടക്കൂടുകളിലേക്ക് ചുരുക്കി ഇസ്ലാമിക ലോകം കെട്ടിപ്പടുക്കാനുള്ള എദോഗാന്റെ ശ്രമങ്ങളുടെ ഭാഗമാണ് വലിയ പ്രതിഫലം നൽകി പാകിസ്ഥാനി മാധ്യമ പ്രവർത്തകരെ നിയോഗിക്കുന്നതിന് പിന്നിൽ.
ഹഗിയ സോഫിയ അടക്കമുള്ള പൈതൃക സ്മാരകങ്ങളെ വർഗ്ഗീയവത്കരിക്കാനുള്ള ശ്രമങ്ങൾ ഇസ്ലാമിക വികാരം ആഗോള തലത്തിൽ ആളിക്കത്തിക്കാനുള്ള നീക്കങ്ങളുടെ ഭാഗമാണ്. ഇത്തരം നീക്കങ്ങളിലൂടെ ഇസ്ലാമിക ചിഹ്നങ്ങളുടെയും ഇസ്ലാമിക സ്ഥാപനങ്ങളുടെയും പുനസ്ഥാപകൻ എന്ന പദവി നേടിയെടുക്കാനും എർദോഗാൻ പദ്ധതിയിടുന്നു. വിദ്യാഭ്യാസ സ്ഥാപനങ്ങളെ ഇസ്ലാമികവത്കരിക്കുക വഴി വരും തലമുറയെ തീവ്ര ചിന്താഗതിക്കാരാക്കി വളർത്തുവാനും അത് വഴി ഇസ്ലാമിക രാഷ്ട്രീയം വ്യാപിപ്പിക്കാനുമാണ് നീക്കം. യുവാക്കളിലെ സ്വതന്ത്ര ചിന്തകളും ശാസ്ത്രാവബോധവും നശിപ്പിച്ച് അവരെ മതത്തിന്റെ അടിമകളാക്കുന്ന ഭീകര സ്ഥിതി വിശേഷമാണ് തുർക്കി ഉന്നം വെക്കുന്നത്. ചൈന എപ്രകാരമാണോ കമ്മ്യൂണിസ്റ്റ് ആശയങ്ങൾ വരും തലമുറകളിൽ അടിച്ചേൽപ്പിക്കുന്നത്, അതിന് സമാനമായാണ് തുർക്കി ഇസ്ലാമിക രാഷ്ട്രീയം യുവക്കളിൽ കുത്തിവെക്കുന്നത്.
വിദ്യഭ്യാസത്തിൽ പിന്നിൽ നിൽക്കുന്ന വിഭാഗങ്ങളെ നിർബ്ബന്ധിച്ച് മതപാഠശാലകളിൽ എത്തിക്കുകയും ഇവരുടെ അസന്തുഷ്ടികളെയും അരക്ഷിതാവസ്ഥകളെയും മതത്തിലേക്ക് ചുരുക്കുകയും ചെയ്യുന്നു. അപകടകരമായ അവസ്ഥയിൽ ലഹരി പോലെ ഇവരിൽ മതം തലക്ക് പിടിക്കുന്നതിനെ രാഷ്ട്രീയമായി ഉപയോഗിക്കുകയാണ് തുർക്കിയുടെ ലക്ഷ്യം. വിദ്യാഭ്യാസ മേഖലയിൽ മതപ്രചാരണം സുഗമമായി നടപ്പിലാകാൻ മത -സാംസ്കാരിക വിഭാഗമായ ദിയാനെറ്റിനെ തുർക്കി ഫലപ്രദമായി ഉപയോഗിക്കുന്നു. മതചിഹ്നങ്ങളും ആശയങ്ങളും അടങ്ങിയ കലണ്ടറുകളും ലഘുലേഖകളും വിദ്യാലയങ്ങളിൽ വ്യാപകമായി വിതരണം ചെയ്യപ്പെടുന്നു.
ഇസ്ലാമിലെ വിഭാഗീയതയെയും തീവ്രമത ബോധനത്തിലൂടെ തുർക്കി ആളിക്കത്തിക്കുന്നു. മുപ്പതിൽ പരം വിഭാഗങ്ങളും നൂറോളം ഉപവിഭാഗങ്ങളുമായി വിഘടിച്ചു നിൽക്കുന്ന ഗോത്രസമൂഹങ്ങളിലെ സംഘർഷം സജീവമായി നിലനിർത്തി ഭ്രാന്തൻ വർഗീയവാദികളാക്കി ജനങ്ങളെ മാറ്റാനും എർദോഗാൻ ശ്രമിക്കുന്നു. പാർശ്വവത്കരിക്കപ്പെട്ട ജനസമൂഹങ്ങളെ ഫലപ്രദമായി ഉപയോഗിക്കുന്നതിനൊപ്പം പാകിസ്ഥാനിലെ മാധ്യമങ്ങളെയും വിലക്കെടുത്ത് മതരാഷ്ട്രീയത്തിന്റെ ഏറ്റവും വിനാശകരമായ മുഖം പുറത്തെടുക്കാൻ ശ്രമിക്കുകയാണ് എർദോഗാൻ.
ഏഷ്യയിൽ ഇസ്ലാമിക രാഷ്ട്രീയത്തിന് വേരോട്ടമുണ്ടാക്കാൻ അറബ് രാജ്യങ്ങളെയും ഇന്ത്യയെയും തമ്മിൽ തെറ്റിക്കാൻ തുർക്കി ശ്രമിക്കുന്നു. ഇതിനായി മാധ്യമങ്ങളെ അവർ ഉപയോഗിക്കുന്നു. കശ്മീർ വിഷയത്തിൽ ഉൾപ്പെടെ ഇന്ത്യ മുസ്ലിങ്ങൾക്ക് എതിരാണെന്ന ആശയം അവർ പ്രചരിപ്പിക്കാൻ ശ്രമിക്കുന്നു. പാക് അധീന കശ്മീരിലും ഗിൽഗിത്ത് ബാൾട്ടിസ്ഥാനിലും പാകിസ്ഥാൻ നടത്തുന്ന മനുഷ്യാവകാശ ധ്വംസനങ്ങളുടെ ചിത്രങ്ങൾ, കശ്മീരിൽ ഇന്ത്യ നടത്തുന്ന മുസ്ലീം വേട്ടയായി പ്രചരിപ്പിക്കാൻ പാക് മാധ്യമ പ്രവർത്തരുടെ പിന്തുണ തേടുകയാണ് തുർക്കി. പാകിസ്ഥനെതിരെ ശക്തമായ നിലപാട് സ്വീകരിക്കുന്ന യു എ ഇ ഉൾപ്പെടെയുള്ള രാജ്യങ്ങളെ ഇസ്ലാമിക രാഷ്ട്രങ്ങളുടെ കൂട്ടായ്മയിൽ ഒറ്റപ്പെടുത്താനുള്ള നീക്കങ്ങളും ഓ ഐ സിയുടെ നിലപാട് മാറ്റവും അപകടകരമായ ഭീഷണിയാണ് ആഗോള സമാധാനത്തിന് സൃഷ്ടിക്കുന്നത്.
Discussion about this post