ഹൈദരാബാദ് : സോഫ്റ്റ് ഡ്രിങ്കായ മൗണ്ടൻ ഡ്യൂ ബ്രാൻഡ് നെയിം പെപ്സികോയ്ക്ക് നഷ്ടമായി. ഹൈദരാബാദ് ആസ്ഥാനമായുള്ള മാഗ്ഫാസ്റ്റ് ബിവറേജസ് കമ്പനി നൽകിയ കേസിനെ തുടർന്നാണ് പെപ്സികോയ്ക്ക് തങ്ങളുടെ മൗണ്ടൻ ഡ്യൂ എന്ന ബ്രാൻഡ് നെയിം നഷ്ടമായത്.
2003-ലാണ് യു.എസ് ആസ്ഥാനമായുള്ള പെപ്സികോ കമ്പനി മൗണ്ടൻ ഡ്യൂ സോഫ്റ്റ് ഡ്രിങ്ക് വിപണിയിലിറക്കുന്നത്.എന്നാൽ, മാഗ്ഫാസ്റ്റ് ബിവറേജസ് രണ്ടായിരത്തിൽ തന്നെ തങ്ങളുടെ കമ്പനിയുടെ ഉൽപ്പന്നമായ മൗണ്ടൈൻ ഡ്യൂ മിനറൽ വാട്ടർ വിപണിയിലിറക്കിയിരുന്നു. ഇതേ തുടർന്ന്, കമ്പനിയുടെ ചെയർമാനായ സയീദ് ഗസിയുദീനെതിരേ പെപ്സികോ ഡൽഹി ഹൈക്കോടതിയിൽ കേസ് കൊടുത്തുവെങ്കിലും കോടതി പരാതി തള്ളി. ഗസിയുദീന്റെ അപേക്ഷയെ തുടർന്ന്, കേസ് ഡൽഹി ഹൈക്കോടതിയിൽ നിന്നും ഹൈദരാബാദ് ഹൈക്കോടതിലേക്ക് മാറ്റി. 15 വർഷത്തെ നിയമ പോരാട്ടത്തിന് ശേഷം, 2019 ഡിസംബർ 31ന് പെപ്സികോ കമ്പനിയുടെ എല്ലാ വാദങ്ങളും തള്ളി മാഗ്ഫാസ്റ്റ് ബീവറേജിന് അനുകൂലമായി വിധി വന്നു.
ലോകം മുഴുവൻ വിതരണ ശൃംഖലയുള്ള ആഗോള കോർപ്പറേറ്റ് ഭീമനായ പെപ്സികോയുടെ ഏറ്റവും വിൽപ്പനയുള്ള സോഫ്റ്റ് ഡ്രിങ്കുകളിൽ ഒന്നാണ് മൗണ്ടൻ ഡ്യൂ. കോടതി വിധി, കുത്തക ഭീമന് വൻ തിരിച്ചടിയായിരിക്കുകയാണ്.
