ഇന്ത്യൻ വനിതാ ക്രിക്കറ്റ് ടീമിന്റെ നായിക സ്ഥാനത്തുനിന്നും ഹർമൻപ്രീത് കൗർ രാജിവെച്ചതിനെ തുടർന്ന് ഓപ്പണിങ് ബാറ്റർ സ്മൃതി മന്ദാന പുതിയ ക്യാപ്റ്റനായി ചുമതലയേൽക്കുന്ന വാർത്ത ഇന്നലെ മുതൽ സോഷ്യൽ മീഡിയയിൽ നിറഞ്ഞിരുന്ന. ബിസിസിഐയുമായി നടന്ന റിവ്യൂ മീറ്റിംഗിന് ശേഷമാണ് എല്ലാ ഫോർമാറ്റുകളിൽ നിന്നും നായകസ്ഥാനമൊഴിയാൻ 37 കാരിയായ ഹർമൻപ്രീത് തീരുമാനിച്ചത്. ഏഷ്യൻ ഗെയിംസിൽ ഇന്ത്യയ്ക്ക് തുടർച്ചയായി രണ്ടാം സ്വർണം നേടിക്കൊടുത്താണ് ഹർമൻപ്രീത് തന്റെ ദീർഘകാല നായകത്വത്തിന് വിരാമമിട്ടത്. നിലവിൽ ഇന്ത്യയുടെ ഏറ്റവും മികച്ച ബാറ്ററായ 30 കാരിയായ മന്ദാനയ്ക്ക് ഈ ചുമതല ലഭിക്കുന്നത് വൈകിപ്പോയോ എന്ന ചോദ്യവും ക്രിക്കറ്റ് ലോകത്ത് ഉയരുന്നുണ്ട്. 2013-ൽ അരങ്ങേറിയ മന്ദാന മൂന്ന് ഫോർമാറ്റുകളിലുമായി പതിനായിരത്തിലധികം റൺസ് നേടി പ്രകടന മികവിൽ മുന്നിലാണ്.
കഴിഞ്ഞ വർഷം നാട്ടിൽ നടന്ന ഏകദിന ലോകകപ്പ് വിജയത്തിന് ശേഷവും നായകസ്ഥാനത്ത് മാറ്റമില്ലാതെ തുടർന്ന ബിസിസിഐ സെലക്ടർമാരുടെ നിലപാടിൽ മന്ദാനയ്ക്ക് അതൃപ്തിയുണ്ടായിരുന്നു. ബിസിസിഐ സെക്രട്ടറി ദേവജിത് സൈകിയയുടെ നേതൃത്വത്തിൽ ഗുവഹാത്തിയിൽ നടന്ന അവലോകന യോഗത്തിലാണ് ടീമിൽ നേതൃമാറ്റം അനിവാര്യമാണെന്ന് ഹർമൻപ്രീതിനെ അറിയിച്ചത്. തുടർച്ചയായ ടി20 ലോകകപ്പുകളിലെ മോശം പ്രകടനമാണ് ടീം മാനേജ്‌മെന്റിനെ മാറ്റത്തെക്കുറിച്ച് ചിന്തിപ്പിച്ചത്.
കഴിഞ്ഞ കുറച്ചുകാലമായി ഹർമൻപ്രീതും മന്ദാനയും തമ്മിലുള്ള വ്യക്തിബന്ധത്തിലുണ്ടായ അസ്വാരസ്യങ്ങൾ ഡ്രസിംഗ് റൂമിലെ അന്തരീക്ഷത്തെ ബാധിച്ചിരുന്നതായി റിപ്പോർട്ടുകളുണ്ട്. ഇരുവരും തമ്മിൽ മുഖത്തോട് മുഖം നോക്കി സംസാരം ഇല്ലെന്നും നേരിൽ കണ്ടാൽ പോലും നോക്കാറില്ലെന്നുമാണ് പുറത്തുവരുന്ന റിപ്പോർട്ടുകൾ. രണ്ടുമൂന്ന് വർഷം മുൻപ് തന്നെ മന്ദാനയ്ക്ക് ഏകദിന, ടെസ്റ്റ് നായകസ്ഥാനം നൽകണമായിരുന്നുവെന്ന് മുൻ ക്യാപ്റ്റൻ മിതാലി രാജും മുമ്പ് വ്യക്തമാക്കിയിരുന്നു. 2022-ൽ മിതാലി രാജിൽ നിന്ന് ഹർമൻപ്രീത് ക്യാപ്റ്റൻസി ഏറ്റെടുത്തപ്പോഴും സമാനമായ അഭിപ്രായവ്യത്യാസങ്ങൾ ടീമിലുണ്ടായിരുന്നു. ഹർമൻപ്രീത് ഇനിയും കളിക്കാരിയായി തുടരാൻ ആഗ്രഹിക്കുന്ന സാഹചര്യത്തിൽ, ഇരുവരും തമ്മിലുള്ള ഭിന്നത മാറ്റിവെച്ച് മുൻപോട്ടു പോകുന്നത് ടീമിന്റെ പ്രകടനത്തിന് നിർണായകമാകും.
