ന്യൂഡൽഹി : കോൺഗ്രസ് ദേശീയ വക്താവും സിനിമാ താരവുമായ ഖുശ്ബു കോൺഗ്രസിൽ നിന്നും രാജി വച്ചു. കോൺഗ്രസ് അധ്യക്ഷ സോണിയാ ഗാന്ധിക്ക് രാജിക്കത്ത് നൽകിയെന്നാണ് ലഭ്യമാകുന്ന വിവരങ്ങൾ. പിന്നാലെ, എ.ഐ.സി.സി വക്താവ് സ്ഥാനത്തു നിന്നും ഖുശ്ബുവിനെ മാറ്റി.
ജനങ്ങളുമായി യാതൊരു ബന്ധവുമില്ലാത്ത, യാഥാർത്ഥ്യ ബോധമില്ലാത്ത, പാർട്ടിയുടെ ഉന്നതതലത്തിലുള്ള ചില ശക്തികൾ തന്നെ പോലെ ആത്മാർത്ഥമായി നിൽക്കുന്നവരെ ഒതുക്കാനാണ് ശ്രമിക്കുന്നതെന്ന് സോണിയ ഗാന്ധിക്ക് നൽകിയ രാജിക്കത്തിൽ ഖുശ്ബു വ്യക്തമാക്കി. ഖുശ്ബു ബി.ജെ.പി ദേശീയ നേതാക്കളുമായി കൂടിക്കാഴ്ച നടത്തുന്നതിനായി ഡൽഹിയിലെത്തിയതിനു പിന്നാലെയാണ് എ.ഐ.സി.സി വക്താവ് സ്ഥാനത്തു നിന്നും ഖുശ്ബുവിനെ ഒഴിവാക്കിയത്.
ബി.ജെ.പി ദേശീയ അധ്യക്ഷൻ ജെ.പി നദ്ദയുടെ സാന്നിധ്യത്തിൽ ഖുശ്ബു ഉൾപ്പെടെയുള്ള തമിഴകത്തെ 3 പ്രമുഖർ ഇന്ന് ബി.ജെ.പിയുടെ അംഗത്വം സ്വീകരിക്കുമെന്നാണ് സൂചനകൾ. ഖുശ്ബു രാഷ്ട്രീയ പ്രവേശനം നടത്തിയത് ഡി.എം.കെയിലൂടെയായിരുന്നു. 2014-ലാണ് താരം കോൺഗ്രസിൽ ചേരുന്നത്. ഇതിന് പിന്നാലെ, ദേശീയ വക്താവായി നിയമിക്കപ്പെട്ടെങ്കിലും സംസ്ഥാന കോൺഗ്രസ് നേതൃത്വവുമായി അഭിപ്രായ വ്യത്യാസങ്ങളുണ്ടായിരുന്നുവെന്ന് റിപ്പോർട്ടുകൾ വ്യക്തമാക്കുന്നു.
