മുംബൈ: ഇന്ത്യ ചാമ്പ്യന്മാരായ 2008ലെ മലേഷ്യ അണ്ടർ 19 ലോകകപ്പിൽ ടോപ് സ്കോററായിരുന്ന തന്മയ് ശ്രീവാസ്തവ വിരമിച്ചു. അന്ന് ഫൈനലിൽ ഉൾപ്പെടെ ഇന്ത്യയുടെ ടോപ് സ്കോററായി കിരീടവിജയത്തിൽ നിർണായക പങ്കുവഹിച്ച താരമാണ് അകാലത്തിൽ കളി മതിയാക്കുന്നത്.
പന്ത്രണ്ട് വർഷങ്ങൾക്ക് മുൻപ് മലേഷ്യയിൽ നടന്ന അണ്ടർ 19 ലോകകപ്പിൽ 52.40 ശരാശരിയിൽ 262 റൺസ് അടിച്ചുകൂട്ടിയാണ് തന്മയ് ശ്രീവാസ്തവ ടോപ് സ്കോററായത്. ക്വാലലംപുരിൽ നടന്ന ഫൈനൽ മത്സരത്തിൽ 46 റൺസുമായി ടോപ് സ്കോററായ തന്മയിന്റെ ബാറ്റിംഗ് മികവിൽ മഴ നിയമത്തിന്റെ പിൻബലത്തിൽ ദക്ഷിണാഫ്രിക്കയെ 12 റൺസിന് പരാജയപ്പെടുത്തി ഇന്ത്യ കിരീടം നേടുകയായിരുന്നു.
2008ൽ കിരീടം ചൂടിയ ലോകകപ്പ് ടീമിനെ നയിച്ച വിരാട് കോലി ഉൾപ്പെടെയുള്ളവർ അന്താരാഷ്ട്ര ക്രിക്കറ്റിൽ മികച്ച പ്രകടനം തുടരുമ്പോഴാണ് അന്ന് ടോപ് സ്കോററായിരുന്ന തന്മയ് ശ്രീവാസ്തവ 30–ാം വയസ്സിൽ വിരമിക്കൽ പ്രഖ്യാപിക്കുന്നത്. വിരാട് കോലിക്കു പുറമെ ഓസ്ട്രേലിയൻ താരങ്ങളായ സ്റ്റീവ് സ്മിത്ത്, മാർക്കസ് സ്റ്റോയ്നിസ്, പാക്കിസ്ഥാൻ താരങ്ങളായ ഇമാദ് വാസിം, ഷാൻ മസൂദ്, അഹമ്മദ് ഷെഹ്സാദ്, ഉമർ അക്മൽ, ദക്ഷിണാഫ്രിക്കയുടെ വെയ്ൻ പാർനൽ, പീറ്റർ മലാൻ, റീസ ഹെൻഡ്രിക്സ്, ശ്രീലങ്കയുടെ ദിനേഷ് ചണ്ഡിമൽ, കുശാൽ പെരേര, തിസാര പെരേര, ലഹിരു തിരിമാന്നെ, ന്യൂസീലൻഡ് താരങ്ങളായ കെയ്ൻ വില്യംസൻ, കോറി ആൻഡേഴ്സൻ, ഇംഗ്ലിഷ് താരം ക്രിസ് വോക്സ്, വിൻഡീസ് താരം ഡാരൻ ബ്രാവോ തുടങ്ങിയവരും അന്നത്തെ ടൂർണമെന്റിന്റെ സംഭാവനകളായിരുന്നു.
2008–09 സീസണിൽ ഉത്തർപ്രദേശിനായി ഫസ്റ്റ് ക്ലാസ് ക്രിക്കറ്റിൽ ഏറ്റവും കൂടുതൽ റൺസ് നേടിയ താരമായിരുന്നു തന്മയ്. അണ്ടർ 19 ലോകകപ്പിലെ തകർപ്പൻ പ്രകടനത്തിന്റെ ബലത്തിൽ ഐപിഎലിൽ കിങ്സ് ഇലവൻ പഞ്ചാബ് താരത്തെ സ്വന്തമാക്കിയിരുന്നു. ഫസ്റ്റ് ക്ലാസ് ക്രിക്കറ്റിൽ 90 മത്സരങ്ങൾ കളിച്ച ശ്രീവാസ്തവ, 34.39 ശരാശരിയിൽ 4918 റൺസ് നേടി. ഇതിൽ 10 സെഞ്ചുറികളും 27 അർധസെഞ്ചുറികളും ഉൾപ്പെടുന്നു. ലിസ്റ്റ് എ ക്രിക്കറ്റിൽ 44 മത്സരങ്ങളിൽനിന്നായി 44.30 ശരാശരിയിൽ 1728 റൺസ് നേടി. ഇതിൽ ഏഴു സെഞ്ചുറികളും 10 അർധസെഞ്ചുറികളും ഉൾപ്പെടുന്നു.
വിരാട് കോലിക്കു പുറമെ രവീന്ദ്ര ജഡേജ, സൗരഭ് തിവാരി, സിദ്ധാർഥ് കൗൾ, അഭിനവ് മുകുന്ദ്, മനീഷ് പാണ്ഡെ, പ്രദീപ് സാങ്വാൻ തുടങ്ങിയവരും അന്നത്തെ ലോകകപ്പ് ടീമിൽ അംഗങ്ങളായിരുന്നു. ആഭ്യന്തര ക്രിക്കറ്റിൽ മികച്ച പ്രകടങ്ങൾ കാഴ്ചവെച്ചിട്ടും ദേശീയ ടീമിൽ തന്മയ് ശ്രീവാസ്തവക്ക് അവസരം നിഷേധിക്കപ്പെട്ടത് പലരും ചൂണ്ടിക്കാട്ടിയിരുന്നു. ട്വിറ്ററിലൂടെയാണ് തന്മയ് വിരമിക്കൽ പ്രഖ്യാപിച്ചത്.
It’s time to bid adeu to my cricketing playing career! I’ve built memories, made friends, achieved the best I could in these years playing Junior Cricket, Ranji Trophy and most importantly being a good performer in U-19 World Cup,2008 and bringing the cup home with the team!! pic.twitter.com/gYCvPGNV5g
— Tanmay Srivastava (@srivastavtanmay) October 24, 2020
Discussion about this post