തിരുവനന്തപുരം: സംസ്ഥാനത്ത് വൈദ്യുതി പ്രതിസന്ധിയും അപ്രഖ്യാപിത പവർകട്ടും തുടരുന്നതിനിടെ ഉപഭോക്താക്കൾക്ക് വലിയ ആശ്വാസമേകുന്ന തീരുമാനവുമായി കെഎസ്ഇബി. ഇനി മുതൽ പ്രദേശത്തെ ലോഡ് ഷെഡിങ് സമയവും വൈദ്യുതി തടസ്സവും മുൻകൂട്ടി അറിയാൻ സാധിക്കും. ഇതിനായി പവർകട്ട് നടപ്പാക്കുന്നതിന് ഒന്നര മണിക്കൂർ മുൻപ് ഉപഭോക്താക്കളുടെ മൊബൈൽ ഫോണിലേക്ക് കെഎസ്ഇബി കൃത്യമായ മുൻറിയിപ്പ് സന്ദേശം അയക്കും.
തിരുവനന്തപുരം ജില്ലയിൽ നടപ്പാക്കിയ ആദ്യഘട്ട പരീക്ഷണം വിജയകരമായതിനെ തുടർന്നാണ് പദ്ധതി സംസ്ഥാനത്തുടനീളം വ്യാപിപ്പിക്കുന്നത്. ഒഎംഎസ് (Outage Management System) സോഫ്റ്റ്വെയർ സംവിധാനവുമായി ബന്ധപ്പിച്ചാണ് സന്ദേശങ്ങൾ അയക്കുന്നത്. കെഎസ്ഇബിയിൽ രജിസ്റ്റർ ചെയ്ത മൊബൈൽ നമ്പറുകളിലേക്ക് നേരിട്ട് എസ്എംഎസ് ആയോ ‘കെഎസ്ഇബി വിത്ത് യു’ (KSEB With You) ആപ്പ് വഴിയോ അറിയിപ്പുകൾ ലഭിക്കും. രജിസ്റ്റർ ചെയ്യാത്ത ഉപഭോക്താക്കൾക്ക് കെഎസ്ഇബിയുടെ വെബ്സൈറ്റ് വഴി കൺസ്യൂമർ നമ്പറും ബിൽ നമ്പറും നൽകി നമ്പർ ബന്ധിപ്പിക്കാം.
അതേസമയം, സംസ്ഥാനത്തെ വൈദ്യുതി നിയന്ത്രണത്തിൽ കൃത്യമായ ശാസ്ത്രീയ ക്രമീകരണം കൊണ്ടു വരാനാണ് തീരുമാനം. ഓരോ പ്രദേശത്തും ഓരോ ദിവസവും വെവ്വേറെ സമയങ്ങളിൽ കറന്റ് പോകുന്ന രീതി ഒഴിവാക്കി, ഒരു ആഴ്ചയോളം ഒരേ സമയക്രമത്തിൽ തന്നെ പവർകട്ട് നിലനിർത്താൻ നിർദേശം നൽകിയിട്ടുണ്ട്. സബ്സ്റ്റേഷനുകൾക്ക് കീഴിലുള്ള ഫീഡർ അടിസ്ഥാനത്തിലായിരിക്കും നിയന്ത്രണം നടപ്പാക്കുക.
കഴിഞ്ഞ ദിവസങ്ങളിൽ വൈകീട്ടത്തെ പീക്ക് സമയങ്ങളിൽ സംസ്ഥാനത്ത് 700 മുതൽ 900 മെഗാവാട്ടിന്റെ വരെ ലഭ്യതക്കുറവും ഉപഭോഗത്തിൽ വൻ വർധനവുമാണ് രേഖപ്പെടുത്തിയത്. തുടർന്നാണ് ജലവൈദ്യുതി ഉൽപ്പാദനം ഉയർത്തി പ്രതിസന്ധി താൽക്കാലികമായി പരിഹരിക്കാൻ ശ്രമം നടക്കുന്നത്. പുതിയ മുൻകൂട്ടി അറിയിക്കൽ സംവിധാനം നിലവിൽ വരുന്നതോടെ വീട്ടാവശ്യങ്ങൾക്കും മറ്റ് ജോലികൾക്കുമായി സമയം മുൻകൂട്ടി ക്രമീകരിക്കാൻ ഉപഭോക്താക്കൾക്ക് സാധിക്കും.
