ലഹരി കടത്തു കേസിലും, കള്ളപ്പണം വെളുപ്പിച്ച കേസിലും അറസ്റ്റിലായ ബിനീഷ് കോടിയേരിയുടേ ഇന്നത്തെ അവസ്ഥയ്ക്ക് കാരണം കോടിയേരി ബാലകൃഷ്ണനും സിപിഎമ്മുമാണെന്ന് വിലയിരുത്തല്‍. ഇത് സംബന്ധിച്ച് നിരവധി അഭിപ്രായങ്ങളം ചര്‍ച്ചകളുമാണ് നവമാദ്ധ്യമങ്ങളില്‍ നടക്കുന്നത്.
അന്വേഷണ ഏജന്‍സി നിരന്തരം ചോദ്യം ചെയ്യുന്നുവെന്നും, ചെയ്യാത്ത കുറ്റം ഏല്‍ക്കാന്‍ പ്രേരിപ്പിക്കുന്നുവെന്നും ബിനീഷ് കോടിയേരി വിലപിയ്ക്കുമ്പോള്‍ വിദ്യാര്‍ത്ഥി കാലം മുതല്‍ അയാള്‍ കാണിച്ചുകൂട്ടിയ എല്ലാ ഗുണ്ടാ തെമ്മാടിത്തരങ്ങളില്‍ നിന്നും ബിനീഷിനെ രക്ഷിച്ച അച്ഛനും പാര്‍ട്ടിയുമാണ് ആ വിലാപത്തിനു കാരണമെന്നാണ് വിലയിരുത്തല്‍. അച്ഛന്റേയും മാര്‍ക്‌സിസ്റ്റ് പാര്‍ട്ടിയുടേയും തണലിന്റെ അഹങ്കാരത്തിലാണ് കടലിന്റെ ആഴം കണ്ടവനെ കുളത്തിന്റെ ആഴം കാട്ടി പേടിപ്പിക്കരുത് എന്ന് ബിനീഷ് കോടിയേരി പൊതു സമൂഹത്തോട് വിളിച്ച് പറയാന്‍ കാരണമായത് എന്നും ചിലര്‍ ചൂണ്ടിക്കാട്ടുന്നു.
കോടിയേരി ബാലകൃഷ്ണന്‍ കേരളത്തില്‍ അഭ്യന്തര മന്ത്രിയായിരുന്ന കാലത്താണ് തൊടുപുഴയില്‍ പ്രൊഫ. ടി ജെ ജോസഫ് സാറിന്റെ കൈ മുസ്ലീം ഭീകരവാദികള്‍ വെട്ടി മാറ്റിയത്. ചോദ്യപ്പേപ്പറില്‍ മതനിന്ദ ആരോപിച്ച് പോലീസ് കേസ് എടുക്കുകയും മതമൗലികവാദികളുടെ ഭീഷണി ഉയരുകയും ചെയ്തപ്പോള്‍ ജോസഫ് സാര്‍ ഒളിവില്‍ പോയി. ഒരു തെറ്റും ചെയ്യാഞ്ഞിട്ടും ജോസഫ് സാറിനെ സംരക്ഷിക്കേണ്ടവരായിട്ടും കോടിയേരി ബാലകൃഷ്ണന്‍ പോലീസിനെക്കൊണ്ട് ആ കുടുംബത്തെ വേദനിപ്പിച്ചതിനു കണക്കില്ല.
ജോസഫ് സാറിന്റെ വിദ്യാര്‍ത്ഥിയായ മകന്‍ മിഥുനെ മൂന്ന് ദിവസം പോലീസ് കസ്റ്റഡിയില്‍ ഭീകരമായി മര്‍ദ്ദിച്ച്, വിവരം ബന്ധുക്കളെ അറിയിച്ചും അവരെ തേജോവധം ചെയ്തുമാണ് കോടിയേരിയുടെ പോലീസ് ജോസഫ് സാറിനെ തിരികെ എത്തിച്ചത്. അതിനു ശേഷം മതഭീകരവാദികള്‍ സാറിനെ പരസ്യമായി അവയവങ്ങള്‍ അറുത്ത് മാറ്റി. അത് നടപ്പിലാക്കാന്‍ അവര്‍ക്ക് മുന്നില്‍ ജോസഫ് സാറിനെ ഇട്ടുകൊടുത്തത് കോടിയേരി ബാലകൃഷ്ണനാണ്. കേസ് കോടതിയിലെത്തിയപ്പോള്‍ മതഭീകരവാദികള്‍ക്ക് അനുകൂലമായ നിലപാടാണ് ആഭ്യന്തര മന്ത്രിയായിരുന്ന ബാലകൃഷ്ണന്‍ എടുത്തത്. താലിബാന്‍ മാതൃകയിലുള്ള ഒരു കോടതിയുടെ വിധിയെത്തുടര്‍ന്നാണ് ഈ ആക്രമണമുണ്ടായതെന്ന് വ്യക്തമായ റിപ്പോര്‍ട്ടുകള്‍ ഉണ്ടായിരുന്നിട്ടും സംസ്ഥാന മന്ത്രിസഭയിലെ ആഭ്യന്തരമന്ത്രിയായിരുന്ന കോടിയേരി ബാലകൃഷ്ണന്‍ സര്‍ക്കാരിന് ഇത്തരം കോടതിയെപ്പറ്റി വിവരമില്ലയെന്നാണ് അയാള്‍ പരസ്യപ്രസ്താവന നടത്തിയത്.
ശബരിമല പ്രക്ഷോഭകാലത്ത് ആയിരക്കണക്കിന് അയ്യപ്പഭക്തരെ കള്ളക്കേസ്സില്‍ കുടുക്കി ജയിലിലടച്ചപ്പോള്‍ പ്രകൃതി ഇത്തരം ഒരു വിധി കല്‍പ്പിക്കുമെന്ന് അധികാര ഹുങ്കില്‍ കോടിയേരിയും പാര്‍ട്ടിയും കരുതിയില്ല എന്നും സി.പി.എം ന്റെ ഈ ഗതികേടും നാശവും മറ്റ് കക്ഷികള്‍ക്കും പാഠമാകേണ്ടതാണെന്നും സാമൂഹ്യമാദ്ധ്യമങ്ങളില്‍ കുറിപ്പുകള്‍ നിറയുന്നു. നല്ല സി.പി.എമ്മും, ബി.ജെ.പിയും കോണ്‍ഗ്രസും ഉണ്ടാകുമ്പോഴാണ് രാഷ്ടീയ പ്രസ്ഥാനങ്ങള്‍ സമൂഹത്തിന് തണലാകുന്നതെന്നും എല്ലാ രാഷ്ട്രീയപ്പാര്‍ട്ടികളും സി പി എമ്മിന്റെ ദയനീയമായ ഈ അവസ്ഥ പാഠമാകേണ്ടതാണെന്നും അഭിപ്രായങ്ങളുയരുന്നുണ്ട്.
