തിരുവനന്തപുരം: ബാർകോഴ കേസന്വേഷണത്തിൽ മുൻമന്ത്രിമാർക്കെതിരെ അന്വേഷണ അനുമതി നൽകുന്നതുമായി ബന്ധപ്പെട്ട് വിജിലൻസ് ഡയറക്ടറെ ഗവർണർ വിളിപ്പിച്ചു.
മുൻ മന്ത്രിമാരായ വി.എസ് ശിവകുമാർ കെ.ബാബു എന്നിവർക്കെതിരെ അന്വേഷണം നടത്താൻ നിയമന അധികാരിയെന്ന നിലയിൽ ഗവർണറുടെ അനുമതി അനിവാര്യമാണ്. ഇന്നലെ അന്വേഷണത്തിന് അനുമതി തേടിയുള്ള ഫയൽ ഗവർണർക്ക് ലഭിച്ചിരുന്നു. എന്നാൽ, ഫയലിൽ പരാമർശിക്കുന്ന കാര്യങ്ങളിൽ കൂടുതൽ വിശദീകരണം ആവശ്യമുള്ളതിനാലാണ് ഗവർണർ ആരിഫ് മുഹമ്മദ് ഖാൻ വിജിലൻസ് ഡയറക്ടറെ വിളിപ്പിച്ചിരിക്കുന്നത്.
അവധിയിലുള്ള വിജിലൻസ് ഡയറക്ടർ വ്യാഴാഴ്ച തിരിച്ചെത്തിയാൽ ഗവർണറെ കാണും. കൂടിക്കാഴ്ചക്ക് ശേഷമാവും മന്ത്രിമാർക്കെതിരെയുള്ള അന്വേഷണത്തിന് അനുമതി നൽകുന്ന കാര്യത്തിൽ അന്തിമ തീരുമാനമെടുക്കുക.
