കൊൽക്കത്ത സാൾട്ട്ലേക്ക് സ്റ്റേഡിയത്തിൽ നടന്ന മത്സരത്തിൽ ബ്രസീലിനെതിരായ 0-4 തോൽവിക്ക് കാരണം കളിക്കാരുടെ വ്യക്തിഗത പിഴവുകളും ശ്രദ്ധക്കുറവുമാണെന്ന് തുറന്നുസമ്മതിച്ച് ഇന്ത്യൻ ഫുട്ബോൾ ടീം പരിശീലകൻ ഖാലിദ് ജമീൽ. ലോകോത്തര ടീമിനെതിരെ മത്സരിക്കുമ്പോൾ ശ്രദ്ധയും ഏകാഗ്രതയും എത്രത്തോളം പ്രധാനമാണെന്ന് ഈ മത്സരം ഓർമ്മിപ്പിക്കുന്നുവെന്നും തോൽവിയിൽ നിന്ന് പാഠങ്ങൾ ഉൾക്കൊള്ളേണ്ടതുണ്ടെന്നും അദ്ദേഹം മത്സരശേഷം പറഞ്ഞു.
വലിയ മത്സരങ്ങൾ കളിക്കുമ്പോൾ കളിക്കാർക്ക് ആത്മവിശ്വാസം ആവശ്യമാണെന്നും രണ്ടു മൂന്ന് ഗോളുകൾ പ്രതിരോധനിരയുടെയും ഗോൾകീപ്പറുടെയും പിഴവുകൾ മൂലമാണ് വഴങ്ങിയതെന്നും അദ്ദേഹം ചൂണ്ടിക്കാട്ടി. ആദ്യ പകുതിയിൽ ഗോൾകീപ്പർ ഗുർപ്രീത് സിംഗ് സന്ധു വരുത്തിയ പിഴവുകൾ തിരിച്ചടിയായെങ്കിലും അദ്ദേഹത്തെ മാത്രം കുറ്റപ്പെടുത്താനാവില്ലെന്നും പരിചയസമ്പന്നനായ ഗുർപ്രീത് ശക്തമായി തിരിച്ചുവരുമെന്നും ജമീൽ പറഞ്ഞു.
കളിയുടെ ഒരു ഘട്ടത്തിൽ സഹൽ അബ്ദുൽ സമദ്, റയാൻ വില്യംസ്, മൻവീർ സിംഗ് എന്നിവരുടെ നേതൃത്വത്തിൽ മികച്ച മുന്നേറ്റങ്ങൾ നടത്താൻ ഇന്ത്യക്ക് സാധിച്ചിരുന്നു. പകരം ഇറങ്ങിയ കളിക്കാർ അവസരങ്ങൾ മുതലാക്കണമെന്നും അടുത്തതായി കൊൽക്കത്തയിൽ തന്നെ ഉറുഗ്വെയ്‌ക്കെതിരെ നടക്കുന്ന മത്സരത്തിൽ കൂടുതൽ മെച്ചപ്പെട്ട പ്രകടനം പുറത്തെടുക്കാനാവുമെന്നാണ് പ്രതീക്ഷയെന്നും പരിശീലകൻ കൂട്ടിച്ചേർത്തു.
