ബ്രിസ്ബേൻ: ഓസ്ട്രേലിയക്കെതിരായ ടെസ്റ്റ് പരമ്പര വിജയത്തോടെ ടെസ്റ്റ് റാങ്കിംഗിലും ഇന്ത്യക്ക് മുന്നേറ്റം. ഐസിസി ടെസ്റ്റ് റാങ്കിംഗിൽ ഓസ്ട്രേലിയയെ പിന്തള്ളി ഇന്ത്യ രണ്ടാമതെത്തി. ഇന്ത്യക്ക് ഇപ്പോൾ 117.65 പോയിന്റുണ്ട്. 113 പോയിന്റുള്ള ഓസ്ട്രേലിയ മൂന്നാമതാണ്. 118.44 പോയിന്റുമായി ന്യൂസിലാൻഡാണ് ഒന്നാമത്.
2-1ന് ബോർഡർ ഗവാസ്കർ പരമ്പര നിലനിർത്തിയ ഇന്ത്യക്ക് ബിസിസിഐ അഞ്ച് കോടി രൂപ പാരിതോഷികം പ്രഖ്യാപിച്ചു. ബിസിസിഐ ജനറൽ സെക്രട്ടറി ജയ് ഷായാണ് ട്വിറ്ററിലൂടെ ഇക്കാര്യം അറിയിച്ചത്.
ടീം ഇന്ത്യയുടെ ഉജ്ജ്വല വിജയത്തിൽ അഭിനന്ദനമറിയിച്ച് പ്രധാനമന്ത്രി നരേന്ദ്ര മോദി, ഗൂഗിൾ സി ഇ ഒ സുന്ദർ പിച്ചൈ, ഇന്ത്യൻ ടീം ക്യാപ്ടൻ വിരാട് കോഹ്ലി തുടങ്ങിയ പ്രമുഖരും രംഗത്തെത്തി.
ഓസ്‌ട്രേലിയയിലെ ഇന്ത്യൻ ക്രിക്കറ്റ് ടീമിന്റെ വിജയത്തിൽ അതിയായ സന്തോഷമുണ്ടെന്നും ആവേശകരവും ഊർജ്ജസ്വലവുമായിരുന്നു ടീം ഇന്ത്യയുടെ പ്രകടനമെന്നും പ്രധാനമന്ത്രി നരേന്ദ്ര മോദി ട്വീറ്റ് ചെയ്തു. ഇന്ത്യൻ ടീമിന് ഭാവിയിലേക്ക് എല്ലാവിധ ആശംസകളും നേരുന്നതായും അദ്ദേഹം അറിയിച്ചു.
