കോട്ടയം: എന്എസ്എസ് ബിജെപിക്കൊപ്പമോ എന്ന ചോദ്യത്തിന് പ്രാധാന്യമേറുകയാണ്. മന്നംജയന്തിക്ക് പ്രധാനമന്ത്രിയും ആഭ്യന്തരമന്ത്രിയും ആശംസകള് നേര്ന്നതും ഇതിന് നന്ദി അറിയിച്ച് ജനറല് സെക്രട്ടറി ജി സുകുമാരന് നായര് കത്തയച്ചതും ഇപ്പോള് ലേഖനം എഴുതിയതുമാണ് ഇത്തരമൊരു സംശയത്തിന് കാരണം. പ്രധാനമന്ത്രിയുടെയും ആഭ്യന്തരമന്ത്രിയുടെയും സന്ദേശങ്ങള് നന്ദിയോടെ സ്മരിക്കുന്നതായി ജി സുകുമാരന് നായര് പറയുന്നു.
പ്രധാനമന്ത്രിയും കേന്ദ്ര ആഭ്യന്തരമന്ത്രിയും ട്വിറ്റര് സന്ദേശം കുറിച്ചതിലൂടെ ഇത് ആദ്യമായി ഇത്തവണ മന്നം ജയന്തിക്ക് ആഗോളതലത്തില് പ്രസിദ്ധി ലഭിച്ചതായും ജി സുകുമാരന് നായര് സര്വീസ് മാസികയിലെ ലേഖനത്തില് ചൂണ്ടിക്കാട്ടുന്നു. ഈ ലേഖനത്തിലെ രാഷ്ട്രീയ പ്രാധാന്യമുണ്ട് എന്നാണ് ചൂണ്ടിക്കാണിക്കപ്പെടുന്നത്. ജനുവരി രണ്ടിന് നടന്ന മന്നംജയന്തിക്ക് ആശംസകള് അറിയിച്ച് പ്രധാനമന്ത്രി നരേന്ദ്ര മോദിയും, കേന്ദ്ര ആഭ്യന്തര മന്ത്രി അമിത് ഷായും ട്വിറ്റര് സന്ദേശം കുറച്ചിരുന്നു. ഇതിനു നന്ദി പ്രകടിപ്പിച്ച് എന്എസ്എസ് ജനറല് സെക്രട്ടറി ജി സുകുമാരന് നായര് ഇരുവര്ക്കും കത്തയച്ചിരുന്നു.
ഇതിനു പുറമേ എന്എസ്എസ് പുറത്തിറക്കുന്ന മുഖമാസികയായ സര്വീസിന്റെ പുതിയ ലക്കത്തിലും ഇക്കാര്യം ചൂണ്ടിക്കാട്ടി ലേഖനമെഴുതിയിരുന്നു. -പ്രധാനമന്ത്രി ഇതാദ്യമായി ആണ് മന്നം ജയന്തി ആശംസകള് അര്പ്പിച്ച് ട്വിറ്റര് സന്ദേശം കുറിക്കുന്നത് എന്ന് ബി ജെ പി നേതാവ് ബി രാധാകൃഷ്ണ മേനോന് ചൂണ്ടിക്കാട്ടി. ബിജെപി കേന്ദ്രങ്ങള് സുകുമാരന് നായരുടെ ലേഖനം സോഷ്യല് മീഡിയ വഴി പ്രചരിപ്പിക്കുന്നുണ്ട്. ബിജെപി സംസ്ഥാന അധ്യക്ഷന് കെ സുരേന്ദ്രന് ഇന്നലെ തന്നെ തന്റെ ഫേസ്ബുക്ക് പോസ്റ്റ് വഴി സുകുമാരന് നായരുടെ ലേഖനം പ്രചരിപ്പിച്ചിരുന്നു.
യുഡിഎഫ് നേതാക്കളുമായി എന്എസ്എസ് സെക്രട്ടറി ജി സുകുമാരന് നായര് അടുത്തകാലത്ത് പ്രകടിപ്പിച്ച അകലം വാര്ത്തയായിരുന്നു. ജനുവരി മൂന്നിന് എന്എസ്എസ് ആസ്ഥാനം സന്ദര്ശിക്കാന് പ്രതിപക്ഷ നേതാവ് രമേശ് ചെന്നിത്തലയും മുഖ്യമന്ത്രി ഉമ്മന്ചാണ്ടിയും അനുമതി തേടിയിരുന്നു. അന്ന് ഇരു നേതാക്കള്ക്കും അനുമതി നല്കാന് ജി സുകുമാരന് നായര് തയ്യാറായിരുന്നില്ല. ഇതിന് പിന്നാലെ ഒരാഴ്ചയ്ക്കുശേഷം മുസ്ലിംലീഗ് നേതാവ് പി കെ കുഞ്ഞാലിക്കുട്ടിയും എന്എസ്എസ് ആസ്ഥാനത്ത് എത്താന് ശ്രമം നടത്തിയിരുന്നു.
തിരുവനന്തപുരത്തുനിന്നും പെരുന്നയിലേക്ക് കുഞ്ഞാലിക്കുട്ടി യാത്ര പുറപ്പെടുകയും ചെയ്തു. എന്നാല് ഒരു നേതാക്കളെയും കാണാന് തനിക്ക് താല്പര്യമില്ല എന്ന് ജി സുകുമാരന് നായര് മറുപടി നല്കുകയായിരുന്നു. അന്ന് ഇക്കാര്യം ജി സുകുമാരന് നായര് ന്യൂസ് 18 കേരളത്തോട് സ്ഥിരീകരിച്ചിരുന്നു. എന്എസ്എസ് വോട്ടുകള് ഒപ്പം വന്നാല് പല ജില്ലകളിലും വിജയിക്കാനും ഇത് കാരണമാകുമെന്ന് ബിജെപി നേതൃത്വം കണക്കുകൂട്ടുന്നു.
Discussion about this post