മുംബൈ: കർഷക സമരത്തിന്റെ മറവിൽ ഇന്ത്യയെ അപമാനിക്കാൻ ശ്രമിക്കുന്നവർക്ക് മറുപടിയുമായി ബോളിവുഡ് താരങ്ങൾ. ഇന്ത്യയെ അപമാനിക്കാൻ ശ്രമിക്കുന്ന വിദേശികൾക്കെതിരെ ഹാഷ്ടാഗ് ക്യാമ്പയിനുമായി രംഗത്ത് വന്നിരിക്കുകയാണ് ബോളിവുഡ് താരങ്ങളായ അക്ഷയ് കുമാറും അജയ് ദേവ്ഗണും സുനിൽ ഷെട്ടിയും അടക്കമുള്ള പ്രമുഖർ. #IndiaTogether and #IndiaAgainstPropaganda എന്ന പേരിൽ ഇവർ ഹാഷ്ടാഗ് ക്യാമ്പയിനും തുടങ്ങിയിട്ടുണ്ട്.
കർഷക സമരങ്ങളുടെ പേരിൽ നടക്കുന്ന കോലാഹലങ്ങളെ പിന്തുണച്ച് കനേഡിയൻ പ്രധാനമന്ത്രി ജസ്റ്റിൻ ട്രൂഡോയും പരിസ്ഥിതി പ്രവർത്തക ഗ്രേറ്റ ത്യുൻബെയും പോൺ താരം മിയ ഖലീഫയും ഗായിക റിഹാനയും രംഗത്ത് വന്നിരുന്നു. ഈ അവസരത്തിലാണ് ഇതിന് മറുപടിയുമായി ഇന്ത്യൻ താരങ്ങൾ രംഗത്ത് വന്നത്.
കർഷകർ രാജ്യത്ത് ഏറെ പ്രാധാന്യമർഹിക്കുന്ന വിഭാഗം തന്നെയാണ്. എന്നാൽ പ്രശ്നങ്ങൾ പരിഹരിക്കാൻ നടക്കുന്ന ശ്രമങ്ങളും നാം കാണണം. വിഭജിക്കാൻ നടക്കുന്ന ശ്രമങ്ങൾക്ക് ചെവി കൊടുക്കുന്നതിന് പകരം രമ്യമായ പരിഹാരത്തിനാണ് ശ്രമിക്കേണതെന്ന് അക്ഷയ് കുമാർ ട്വീറ്റ് ചെയ്തു.
പാതി വെന്ത സത്യത്തേക്കാൾ അപകടകരമായി മറ്റൊന്നുമില്ല. കാര്യങ്ങൾ മനസ്സിലാക്കിയിട്ട് വേണം പ്രതികരണങ്ങളെന്ന് സുനിൽ ഷെട്ടി അഭിപ്രായപ്പെട്ടു.
ഇന്ത്യക്കോ ഇന്ത്യൻ നയങ്ങൾക്കോ എതിരായ ഒരു പ്രചാരണങ്ങളിലും പങ്കെടുക്കരുതെന്ന് അജയ് ദേവ്ഗൺ തന്റെ ആരാധകരോട് അഭ്യർത്ഥിച്ചു. വിഭാഗീയതകൾ മറന്ന് രാജ്യത്തിനൊപ്പം നിൽക്കണമെന്നും അദ്ദേഹം ആവശ്യപ്പെട്ടു.
നേരത്തെ ഗായിക റിഹാനയുടെ ഇന്ത്യാ വിരുദ്ധ പ്രസ്താവനക്കെതിരെ ശക്തമായ പ്രതികരണവുമായി ബോളിവുഡ് താരം കങ്കണ റണാവത്തും രംഗത്ത് വന്നിരുന്നു.
Discussion about this post