കോഴിക്കോട്: കോഴിക്കോട് കൊടിയത്തൂര്‍ ചെറുവാടി പഴംപറമ്ബില്‍ ഭര്‍ത്താവ് ഭാര്യയുടെ കഴുത്തറുത്തുകൊന്നത് സംശയരോഗത്താല്‍ തന്നെയെന്ന് നാട്ടുകാര്‍. ഇന്ന് പുലര്‍ച്ചെയാണ് കൊടിയത്തൂര്‍ പഞ്ചയാത്തില്‍ ചെറുവാടി പഴംപറമ്പില്‍ നാട്ടിക്കല്ലിങ്കല്‍ കുട്ട്യാലിയുടെ മകന്‍ ഷഹീര്‍ ഭാര്യയെ കഴുത്തറുത്തുകൊന്നത്. ആറ് മാസങ്ങള്‍ക്ക് മുമ്പാണ് ഇരുവരുടെയും വിവാഹം കഴിഞ്ഞത്. ഇരുവരും തമ്മില്‍ 10 വയസ്സിന്റെ വ്യത്യാസമുണ്ടായിരുന്നു. വിവാഹത്തിന് ശേഷം ഷഹീര്‍ പുറത്തേക്ക് ഇറങ്ങാറേയില്ലായിരുന്നു എന്ന് ബന്ധുക്കളും നാട്ടുകാരും പറയുന്നു.
മലപ്പുറം ഒതായി സ്വദേശിനിയായ മുഹ്സിലയാണ് കൊല്ലപ്പെട്ടത്. മുഹ്സില ഉറങ്ങിക്കിടക്കുമ്ബോള്‍ ഷഹീര്‍ കഴുത്തറുക്കുകയായിരുന്നു. ഇവരുടെ മുറിയില്‍ നിന്നും പുലര്‍ച്ചെ വലിയ ശബ്ദം കേട്ടതിനെ തുടര്‍ന്ന് തൊട്ടടുത്ത മുറിയില്‍ കിടന്നുറങ്ങുകയായിരുന്ന ഷഹീറിന്റെ മാതാപിതാക്കള്‍ വാതില്‍ തട്ടിവിളിച്ചെങ്കിലും ഷഹീര്‍ തുറക്കാന്‍ തയ്യാറായില്ല. പിന്നീട്ട് തൊട്ടടുത്ത വീട്ടിലെ ബന്ധുക്കളെ ഷഹീറിന്റെ മാതാപിതാക്കള്‍ വിളിച്ചുവരുത്തിയാണ് വാതില്‍ തുറന്നത്.വാതില്‍ തുറന്ന ഉടനെ ഷഹീര്‍ പുറത്തേക്ക് ഇറങ്ങിയോടി.
അയല്‍വാസികളും ബന്ധുക്കളും ചേര്‍ന്നാണ് പുറത്തേക്ക് ഓടിയ ഷഹീറിനെ പിടികൂടിയത്. ബന്ധുക്കള്‍ അകത്ത് കയറി നോക്കിയപ്പോഴാണ് മുഹ്സില കൊല്ലപ്പെട്ട വിവരം അറിയുന്നത്. രക്തത്തില്‍ കുളിച്ച നിലയിലായിരുന്നു മുഹ്സിലയുടെ ശരീരം. ഉടന്‍ തന്നെ കോഴിക്കോട് മെഡിക്കല്‍ കോളേജ് ആശുപത്രിയിലേക്ക് എത്തിച്ചെങ്കിലും മരണപ്പെട്ടിരുന്നു. വീട്ടില്‍ വെച്ച്‌ തന്നെ മരണം സംഭവിച്ചിരുന്നു എന്നാണ് നിഗമനം.വാതില്‍ തുറന്ന ഉടനെ പുറത്തേക്ക് ഓടിയ ഷഹീറിനെ നാട്ടുകാരും ബന്ധുക്കളും ചേര്‍ന്നാണ് പിടികൂടിയത്.
പിന്നീട് മുക്കം പൊലീസില്‍ വിവരം അറിയിക്കുകയും പൊലീസ് എത്തി ഷഹീറിനെ കസ്റ്റഡിയിലെടുക്കുകയുമായിരുന്നു. ഷഹീര്‍ കുറ്റം സമ്മതിച്ചിട്ടുണ്ട്. ഭാര്യയെ സംശയമുള്ള ഷഹീര്‍ ഇക്കാരണം പറഞ്ഞ് എല്ലായിപ്പോഴും വീട്ടില്‍ വഴക്കുണ്ടാക്കാറുണ്ടായിരുന്നു. ഈ വഴക്ക് തന്നെയാണ് ഇപ്പോള്‍ കൊലപാതകത്തില്‍ കലാശിച്ചിരിക്കുന്നു. ഇന്നലെയാണ് മുഹ്സില മലപ്പുറം എടവണ്ണ ഒതായിയിലെ സ്വന്തം വീട്ടില്‍ നിന്നും ഭര്‍ത്താവിന്റെ വീട്ടിലെത്തിയത്.
വീട്ടില്‍ നിന്നും വരാന്‍ വൈകിയതിനെ സംബന്ധിച്ച്‌ കൊല്ലപ്പെടുന്നതിന് മുമ്പ് വഴക്കുണ്ടായിരുന്നതായാണ് വിവരം. ഈ തര്‍ക്കം നിലനില്‍ക്കെയാണ് ഇന്നലെ മുഹ്സില ഉറങ്ങാന്‍ കിടന്നത്. വീട്ടില്‍ നിന്നും വരാന്‍ വൈകിയത് സംബന്ധിച്ച തര്‍ക്കമാണ് കൊലപാതകത്തില്‍ കലാശിച്ചത് എന്നാണ് സൂചന. ഷഹീറിനെ മുക്കം പൊലീസ് കസ്റ്റഡിയിലെടുത്തു.
