ഡൽഹി: കൊവിഡ് പ്രതിരോധ പ്രവർത്തനങ്ങൾക്കായി 7.5 കോടി രൂപ സംഭാവന നൽകി ഐപിഎൽ ടീമായ രാജസ്ഥാൻ റോയൽസ്. കളിക്കാരും ടീം ഉടമസ്ഥരും ടീം മാനേജ്മെന്റും ചേർന്നാണ് പണം നൽകുക. മലയാളി താരം സഞ്ജു സാംസണാണ് രാജസ്ഥാൻ റോയൽസിന്റെ ക്യാപ്ടൻ. ബ്രിട്ടീഷ് ഏഷ്യൻ ട്രസ്റ്റിന്റെയും രാജസ്ഥാൻ റോയൽസ് ഫൗണ്ടേഷന്റെയും പേരിലാണ് തുക നൽകുക.
രാജസ്ഥാൻ സംസ്ഥാനത്തെ കേന്ദ്രീകരിച്ചായിരിക്കും രാജസ്ഥാൻ റോയൽസ് ഫൗണ്ടേഷന്റെ കൊവിഡ് പ്രതിരോധ പ്രവർത്തനങ്ങൾ. ഓക്സിജൻ സംഭരണത്തിനും വിതരണത്തിനുമാകും പ്രാമുഖ്യം നൽകുക.
നേരത്തെ ഇന്ത്യയുടെ കൊവിഡ് പ്രതിരോധ പ്രവർത്തനങ്ങൾക്ക് സഹായവുമായി ക്രിക്കറ്റ് താരങ്ങളായ പാറ്റ് കമ്മിൻസും ബ്രെറ്റ് ലീയും രംഗത്ത് വന്നിരുന്നു. ഓക്സിജൻ വാങ്ങുന്നതിനായി പി എം കെയേർസ് ഫണ്ടിലേക്ക് കമ്മിൻസ് അമ്പതിനായിരം ഡോളർ സംഭാവന നൽകിയപ്പോൾ ബിറ്റ് കോയിനായാണ് ലീ സംഭാവന നൽകിയത്.
