അജിത് അഗർക്കറുടെ ബി.സി.സി.ഐ. സെലക്ഷൻ കമ്മിറ്റി ചെയർമാൻ സ്ഥാനത്തെക്കുറിച്ചുള്ള ചർച്ചകൾ സജീവമാകുന്നു. വെസ്റ്റ് ഇന്ഡീസിനെതിരായ വൈറ്റ് ബോൾ പരമ്പരയ്ക്കുള്ള ടീമിനെ തിരഞ്ഞെടുക്കുന്ന യോഗം അജിത് അഗർക്കറുടെ അവസാനത്തെ യോഗമായേക്കുമെന്നാണ് റിപ്പോർട്ടുകൾ പുറത്തുവരുന്നത്.
ഒക്ടോബർ 4 വരെയാണ് അഗർക്കറുടെ നിലവിലെ കരാറിന്റെ കാലാവഴിയുള്ളത്. എന്നാൽ ഇതുവരെ കരാർ നീട്ടുന്നതുമായി ബന്ധപ്പെട്ട് ബി.സി.സി.ഐയുടെ ഉയർന്ന തലത്തിലുള്ള ആരുടെയും ഭാഗത്തുനിന്ന് ചർച്ചകളോ ബന്ധപ്പെടലുകളോ ഉണ്ടായിട്ടില്ലെന്നാണ് വാർത്താ ഏജൻസിയായ പിടിഐ റിപ്പോർട്ട് ചെയ്യുന്നത്.
വെസ്റ്റ് ഇന്ഡീസ് പരമ്പരയ്ക്കുള്ള ടീം പ്രഖ്യാപനത്തിനുശേഷം, മൂന്ന് വർഷം പ്രവർത്തിക്കാൻ അവസരം നൽകിയതിന് ബി.സി.സി.ഐ സെക്രട്ടറി ദേവജിത് സൈകിയയ്ക്ക് അഗർക്കർ നന്ദി അറിയിച്ച് കത്ത അയച്ചേക്കുമെന്നും അദ്ദേഹത്തോട് അടുത്ത വൃത്തങ്ങളെ ഉദ്ധരിച്ചുള്ള റിപ്പോർട്ടിൽ പറയുന്നു. 2023 ജൂലൈയിലാണ് അജിത് അഗർക്കർ ഈ സ്ഥാനത്തേക്ക് നിയമിതനായത്. അദ്ദേഹത്തിന്റെ കീഴിൽ പരിമിത ഓവർ ക്രിക്കറ്റിൽ ഇന്ത്യ മികച്ച വിജയങ്ങളാണ് സ്വന്തമാക്കിയത്. എങ്കിലും കരാർ നീട്ടുന്നത് സംബന്ധിച്ച് ഒക്ടോബർ 4 വരെ സമയമുണ്ടെങ്കിലും നിലവിലെ സാഹചര്യം വലിയ ചർച്ചകൾക്ക് വഴിവെച്ചിട്ടുണ്ട്.
