ഏഷ്യ കപ്പ് കിരീടദാന ചടങ്ങിൽ പാകിസ്ഥാൻ മന്ത്രിയും ഏഷ്യൻ ക്രിക്കറ്റ് കൗൺസിൽ (എ.സി.സി.) പ്രസിഡന്റുമായ മൊഹ്സിൻ നഖ്വിയിൽ നിന്ന് ട്രോഫി സ്വീകരിക്കാൻ ഇന്ത്യൻ വനിതാ ക്രിക്കറ്റ് ടീം വിസമ്മതിച്ച സംഭവം വലിയ ചർച്ചയാകുന്നു. ഫൈനലിൽ ശ്രീലങ്കയെ 72 റൺസിന് പരാജയപ്പെടുത്തി കിരീടം ചൂടിയ ശേഷമാണ് ഇന്ത്യൻ ടീം നഖ്വിയിൽ നിന്ന് ട്രോഫി വാങ്ങാൻ തയ്യാറാകാതിരുന്നത്. കഴിഞ്ഞ വർഷം പുരുഷ ടീമും സമാനമായ രീതിയിൽ നഖ്വിയിൽ നിന്ന് ട്രോഫി സ്വീകരിക്കാൻ വിസമ്മതിച്ചിരുന്നു. ഇതോടെ സമീപകാല ചരിത്രത്തിൽ ഏറെ ചർച്ച ചെയ്യപ്പെട്ട രണ്ട് ട്രോഫി ബഹിഷ്കരണങ്ങൾക്കാണ് എ.സി.സി. പ്രസിഡന്റായ മൊഹ്സിൻ നഖ്വി സാക്ഷ്യം വഹിക്കേണ്ടി വന്നത്.
ഈ സംഭവത്തിന് പിന്നാലെ പാകിസ്ഥാൻ മുൻ താരം മുഹമ്മദ് യൂസഫ് എക്സ് (ട്വിറ്റർ) പേജിൽ പങ്കുവെച്ച കുറിപ്പ് വലിയ വിവാദങ്ങൾക്ക് വഴിവെച്ചിട്ടുണ്ട്. “അഭിമാനം അഹങ്കാരമായി മാറുമ്പോൾ വിജയത്തിന് യാതൊരു വിലയുമില്ല. ഒരു ടീം വിജയിച്ചേക്കാം, എന്നാൽ വിനയമില്ലാത്ത ഒരു രാജ്യം എപ്പോഴും പരാജയപ്പെട്ടവനായി തുടരും” എന്ന തരത്തിലുള്ള അദ്ദേഹത്തിന്റെ പരാമർശങ്ങൾ സമൂഹമാധ്യമങ്ങളിൽ വലിയ വിമർശനങ്ങൾക്ക് കാരണമായി. മുൻ പാക് താരത്തിന്റെ ഈ പ്രസ്താവനയ്ക്കെതിരെ നിരവധി സോഷ്യൽ മീഡിയ ഉപയോക്താക്കളാണ് രൂക്ഷമായ പ്രതികരണങ്ങളുമായി രംഗത്തെത്തിയത്. സ്വന്തം ടീമിന്റെ പരാജയങ്ങളെയും മുൻകാല ബാക്ക്ഗ്രൗണ്ടിനെയും ചൂണ്ടിക്കാണിച്ചും ഒപ്പം പാകിസ്ഥാൻ വനിതാ ടീമിന്റെ പ്രകടനങ്ങളെ വിമർശിച്ചും ആരാധകർ രംഗത്തുവന്നു. ഈ ആംഗ്യത്തിലൂടെ ശ്രദ്ധ തിരിച്ചുവിടാനാണ് ശ്രമിക്കുന്നതെന്നും ചിലർ അഭിപ്രായപ്പെട്ടു.
ഇന്ത്യൻ വനിതാ ക്രിക്കറ്റ് ടീമിന്റെ ഈ നിലപാട് ബോർഡ് എടുത്ത ബോധപൂർവമായ ഒരു തീരുമാനമാണെന്ന് ബി.സി.സി.ഐ സെക്രട്ടറി ദേവജിത് സൈകിയ വ്യക്തമാക്കി. കഴിഞ്ഞ വർഷം ഏപ്രിലിലുണ്ടായ പഹൽഗാം ഭീകരാക്രമണത്തെ തുടർന്ന് ഇരു രാജ്യങ്ങളും തമ്മിൽ മെയ് മാസത്തിൽ ചെറിയൊരു സൈനിക ഏറ്റുമുട്ടലുമുണ്ടായിരുന്നു. ഇതിന്റെ പശ്ചാത്തലത്തിൽ പുരുഷ ടീം തുടങ്ങിയ പ്രവണതയാണ് വനിതാ ടീമും ഇപ്പോൾ തുടർന്നത്. നിലവിലുള്ള സാഹചര്യങ്ങളും രാജ്യത്തെ പൊതുവികാരവും മുൻനിർത്തി, നഖ്വിയിൽ നിന്ന് ഇന്ത്യൻ ടീം ട്രോഫി സ്വീകരിക്കില്ലെന്ന വിവരം മുൻകൂട്ടി തന്നെ എ.സി.സി. അധികാരികളെ ഔദ്യോഗികമായി അറിയിച്ചിരുന്നുവെന്ന് സൈകിയ പറഞ്ഞു. ഇത് കളിക്കാരെയോ ടൂർണമെന്റിനെയോ കായികവിനോദത്തെയോ ലക്ഷ്യം വെച്ചുള്ളതല്ലെന്നും, മറിച്ച് ബി.സി.സി.ഐ എടുത്ത ഉറച്ച നയപരമായ തീരുമാനമാണെന്നും അദ്ദേഹം കൂട്ടിച്ചേർത്തു.
