ജക്കാര്‍ത്ത: ഇന്തൊനീഷ്യയിലെ സുമാത്രയില്‍ പടിഞ്ഞാറന്‍ തീരത്ത് 6.6 തീവ്രത രേഖപ്പെടുത്തിയ ശക്തമായ ഭൂചലനം അനുഭവപ്പെട്ടു. ആളപായമില്ലെന്നാണ് പ്രാഥമിക റിപോര്‍ട്. സിനാബാങ് നഗരത്തില്‍ നിന്ന് 250 കിലോമീറ്റര്‍ അകലെ നിയാസ് ദ്വീപിനു സമീപം കടലിലാണ് ഭൂചലനം അനുഭവപ്പെട്ടതെന്നാണ് റിപോര്‍ട്. സുനാമി ഭയം മൂലം തീരവാസികള്‍ കടുത്ത ആശങ്കയിലാണെന്ന് ജര്‍മന്‍ റിസര്‍ച് സെന്റര്‍ ഫോര്‍ ജിയോസയന്‍സസ് (ജി എഫ് സെഡ്) പറഞ്ഞു.
അതിനിടെ ഇന്തോനേഷ്യയിലെ കാലാവസ്ഥ, ജിയോ ഫിസിക്സ് ഏജന്‍സിയായ ബിഎംകെജി 7.2 തീവ്രതയിലും 10 കിലോമീറ്റര്‍ ആഴത്തിലും ഭൂചലനം സൃഷ്ടിച്ചുവെങ്കിലും സുനാമി തരംഗത്തിന് കാരണമാകില്ലെന്ന് അറിയിച്ചു.
2004 ഡിസംബര്‍ 26 ന് വടക്കുപടിഞ്ഞാറന്‍ സുമാത്ര തീരത്ത് 9.1 തീവ്രത രേഖപ്പെടുത്തിയ ഭൂചലനത്തില്‍ ഇന്തോനേഷ്യ, ശ്രീലങ്ക, ഇന്ത്യ, തായ്‌ലന്‍ഡ്, മറ്റ് ഒമ്ബത് രാജ്യങ്ങള്‍ എന്നിവിടങ്ങളില്‍ 2,30,000 ആളുകളാണ് മരിച്ചത്.
ഭൂചലനം 20 സെക്കന്‍ഡ് നീണ്ടുനിന്നതായും അതിന്റെ ആഘാതത്തെക്കുറിച്ചുള്ള വിവരങ്ങള്‍ അധികൃതര്‍ ശേഖരിക്കുകയാണെന്നും ദുരന്ത ലഘൂകരണ ഏജന്‍സി ഉദ്യോഗസ്ഥന്‍ പറഞ്ഞു.
Discussion about this post