ഹനോയ്: ഇന്ത്യയിലും യു.കെയിലും കണ്ടെത്തിയ കൊവിഡ് വകഭേദത്തിന്റെ സങ്കരയിനമായ പുതിയ കൊവിഡ് വകഭേദത്തെ വിയറ്റ്നാമില് കണ്ടെത്തി. പുതിയ വകഭേദം അതിവേഗം വായുവിലൂടെ പകരുമെന്ന് വിയറ്റ്നാം ആരോഗ്യമന്ത്രി ഗുയന് തഹ് ലോങ് പറഞ്ഞു.
തൊണ്ടയിലെ ദ്രാവകത്തിലെ (throat fluid) പുതിയ വെെറസിന്റെ സാന്ദ്രത അതിവേഗം വര്ദ്ധിക്കുകയും ചുറ്റുമുളള അന്തരീക്ഷത്തിലേക്ക് ശക്തമായി വ്യാപിക്കുകയും ചെയ്യുന്നതായാണ് കണ്ടെത്തല്. അതേസമയം പുതിയ വകഭേദം ബാധിച്ചവരുടെ എണ്ണം ഇതുവരെയും പുറത്ത് വിട്ടിട്ടില്ല. ഗുയന് തഹ് ലോങിന്റെ പ്രഖ്യാപനത്തിന് മുമ്പ് തന്നെ ആരോഗ്യ മന്ത്രാലയം വിയറ്റ്നാമില് ഏഴു കൊവിഡ് വകഭേദങ്ങള് ഉണ്ടെന്ന് സ്ഥിരീകരിച്ചിരുന്നു.
കഴിഞ്ഞ വര്ഷം കൊവിഡ് വ്യാപനത്തെ വിജയകരമായി അതിജീവിച്ച വിയറ്റ്നാമില് നിലവില് കേസുകള് ഉയരുന്നതാണ് കാഴ്ച. ഈ വര്ഷം ഏപ്രിലിന് ശേഷം പുതിയ രോഗികളുടെ എണ്ണം വര്ധിക്കുകയാണ്. വ്യാവസായിക മേഖലകള് അടങ്ങുന്ന വിയറ്റ്നാമിലെ വലിയ നഗരങ്ങളായ ഹനോയ്, ഹോ ചി മിന് എന്നിവയുള്പ്പെടെയുളള നഗരങ്ങളില് കൊവിഡ് കേസുകളില് ഗണ്യമായ വര്ദ്ധനവുണ്ടായിട്ടുണ്ട്.
97 ദശലക്ഷം ജനസംഖ്യയുളള വിയറ്റ്നാമില് നിലവില് ഒരു ദശലക്ഷത്തിലധികം പൗരന്മാര്ക്ക് വാക്സിനേഷന് നടത്തിയിട്ടുണ്ട്. വാക്സിനേഷന്റെ എണ്ണം വര്ദ്ധിപ്പിച്ച് ഈ വര്ഷം അവസാനത്തോടെ പ്രതിരോധ ശേഷി കെെവരിക്കാമെന്നാണ് വിയറ്റ്നാം ആരോഗ്യമന്ത്രാലയം പ്രതീക്ഷിക്കുന്നത്. രാജ്യത്ത് ഇതുവരെ 6856 പേര്ക്കാണ് കൊവിഡ് സ്ഥിരീകരിച്ചിട്ടുള്ളത്. 47 പേര് മരിച്ചു.
കഴിഞ്ഞ വര്ഷം ഒക്ടോബറോടെ ഇന്ത്യയില് കണ്ടെത്തിയ B.1.617 വകേഭേദം ഇതിനോടകം നിരവധി രാജ്യങ്ങളിലേക്ക് വ്യാപിച്ചിട്ടുണ്ട്. അതേസമയം B.1.1.7 വകഭേദമാണ് യു.കെയില് പടര്ന്നുപിടിച്ചത്. ലോകാരോഗ്യ സംഘടന ഈ രണ്ടു വകഭേദങ്ങളേയും ആശങ്കാജനകമായ കൊവിഡ് വകഭേദങ്ങളുടെ പട്ടികയില് ഉള്പ്പെടുത്തിയിട്ടുണ്ട്. ഇവയുടെ സങ്കരയിനമാണ് ഇപ്പോള് വിയറ്റ്നാമില് സ്ഥിരീകരിച്ചത്.
