മലപ്പുറം: നിയന്ത്രണങ്ങൾ മറികടന്ന് കണ്ടെയ്ന്മെന്റ് സോണിൽ കബഡി കളിച്ച ഒൻപത് പേരെ പൊലീസ് അറസ്റ്റ് ചെയ്തു. മലപ്പുറം ജില്ലയിലെ വെളിയങ്കോടിന് അടുത്ത് പാലപ്പെട്ടിയിലാണ് സംഭവം. പിടികൂടിയവരെ കൊറോണ പരിശോധനയ്ക്ക് വിധേയമാക്കി. ഇവരിൽ ഒരാൾക്ക് രോഗം സ്ഥിരീകരിച്ചു.
കൊറോണ സ്ഥിരീകരിച്ച ആളെ പെരുമ്പടപ്പ് പഞ്ചായത്തിനു കീഴിലെ ചികിത്സാ കേന്ദ്രത്തിലേക്ക് മാറ്റി. മറ്റുള്ളവരോട് വീടിന്റെ പുറത്തിറങ്ങാത്ത രീതിയിൽ നിരീക്ഷണത്തിൽ ഇരിക്കാനും പോലീസും ആരോഗ്യവകുപ്പും കർശന നിർദേശം നൽകി. പിടികൂടിയ ഒൻപത് പേർക്കെതിരെയും പെരുമ്പടപ്പ് പോലീസ് കേസെടുത്തു.
നേരത്തെ മലപ്പുറം ജില്ലയിലെ കണ്ടെയ്ന്മെന്റ് സോണിൽ പഞ്ചായത്ത് മെംബർ നേരിട്ടെത്തി പൊലീസ് ബാരിക്കേഡുകൾ എടുത്ത് മാറ്റിയ സംഭവം ഉണ്ടായിരുന്നു. കൊറോണ മാനദണ്ഡങ്ങൾ ലംഘിച്ച് വിവാഹം നടത്തിയ വീട്ടുടമയ്ക്ക് എതിരെയും പെരുമ്പടപ്പ് പോലീസ് കേസെടുത്തിരുന്നു. വിവാഹത്തിൽ പങ്കെടുത്ത എല്ലാവരെയും കൊറോണ പരിശോധനയ്ക്ക് വിധേയമാക്കുകയും ചെയ്തിരുന്നു.
Discussion about this post