തിരുവനന്തപുരം: വാമനപുരത്ത് കള്ളനോട്ട് കണ്ടെത്തിയ കാറിന്റെ ഉടമയുടെ വീട്ടില്‍ നടത്തിയ പരിശോധനയില്‍ കഞ്ചാവും എയര്‍ ഗണ്ണും പിടിച്ചെടുത്തു. സംഭവസ്ഥലത്ത് നിന്നും ഓടി രക്ഷപെട്ട പാങ്ങോട് സ്വദേശി ഇര്‍ഷാദിനായി പൊലീസും എക്സൈസും തിരച്ചില്‍ ഊര്ജിതമാക്കിയിരിക്കുകയാണ്.
ഇന്നലെയാണ് വ്യാജവാറ്റ് കണ്ടെത്താനുള്ള പരിശോധനക്കിടെ കാറില്‍ സൂക്ഷിച്ച ഒന്നരലക്ഷത്തോളം രൂപയുടെ കള്ളനോട്ട് കണ്ടെത്തിയത്. വാമനപുരം എക്സൈസ് സംഘം ബുധനാഴ്ച നടത്തിയ പരിശോധനക്കിടെ ആദ്യം ഇര്‍ഷാദിന്റെ വാറ്റ് സങ്കേതം കണ്ടെത്തി. അവിടെ നിന്ന് ചാരായവും വാറ്റുപകരണങ്ങളുമെല്ലാം പിടിച്ചെടുക്കുന്നതിനിടെയാണ് ഒളിപ്പിച്ചിട്ടിരിക്കുന്ന കാര്‍ ശ്രദ്ധയില്‍ പെട്ടത്. കാറിനുള്ളില്‍ പ്രത്യേക അറയുണ്ടാക്കിയാണ് അഞ്ഞൂറിന്റെ കള്ളനോട്ടുകള്‍ ഒളിപ്പിച്ചിരുന്നത്.
കള്ളനോട്ട് പിടികൂടിയതോടെ എക്സൈസ് ഇന്‍സ്പെക്ടര്‍ ജി.മോഹന്‍കുമാറിന്റെ നേതൃത്വത്തിലെ സംഘം പാലോട് പൊലീസിനെ വിവരം അറിയിച്ചു. ഇതിന്റെ അടിസ്ഥാനത്തില്‍ ഇര്‍ഷാദിന്റെ പാങ്ങോടിനടുത്ത് കൊച്ചാലമ്മൂട്ടിലുള്ള വീട്ടില്‍ ഇന്ന് പൊലീസ് നടത്തിയ പരിശോധനയിലാണ് എയര്‍ ഗണ്‍ കണ്ടെടുത്തത്. ഇതിനൊപ്പം രണ്ടരക്കിലോ കഞ്ചാവും നാല്‍പതിനായിരത്തോളം രൂപയും കണ്ടെത്തു. ഇര്‍ഷാദ് നേരത്തെയും അബ്കാരി കേസുകളില്‍ അറസ്റ്റിലായിട്ടുണ്ട്.
നെടുമങ്ങാട് ഡിവൈ.എസ്.പി ജെ. ഉമേഷിന്റെയും പാലോട് ഇന്‍സ്പെക്ടര്‍ സി.കെ. മനോജിന്റെയും നേതൃത്വത്തിലാണ് അന്വേഷണം.
