പാലക്കാട്: കേന്ദ്രസർക്കാർ ലക്ഷദ്വീപിൽ ജൈവായുധം പ്രയോഗിച്ചു എന്ന് വ്യാജപ്രചാരണം നടത്തിയ ആക്ടിവിസ്റ്റ് ഐഷ സുൽത്താനക്കെതിരെ രാജ്യദ്രോഹത്തിന് പരാതി നൽകി യുവമോർച്ച. യുവമോർച്ച പാലക്കാട് ജില്ലാ അധ്യക്ഷൻ പ്രശാന്ത് ശിവനാണ് പാലക്കാട് ടൗൺ നോർത്ത് പൊലീസി സ്റ്റേഷനിൽ പരാതി നൽകിയിരിക്കുന്നത്.
കൊവിഡിനെ കേന്ദ്ര സർക്കാർ ലക്ഷദ്വീപിലെ ജനങ്ങൾക്കെതിരെ ഒരു ജൈവായുധമായി ഉപയോഗിക്കുകയാണ് എന്ന് ഐഷ സുൽത്താന മീഡിയ വൺ ചാനലിലെ ചർച്ചക്കിടെ പറഞ്ഞിരുന്നു. ഈ പരാമർശത്തിനെതിരെയാണ് പരാതി.
ലക്ഷദ്വീപിലെ കൊവിഡ് നിയന്ത്രണങ്ങളുമായി ബന്ധപ്പെട്ട് കേരള ഹൈക്കോടതിയിൽ പരാതി പോകുകയും കോടതി അത് തള്ളുകയും ചെയ്തിരുന്നു. ഇത് അറിഞ്ഞു വെച്ചു കൊണ്ട് ഐഷ നടത്തിയ പരാമർശം മത- സാമുദായിക സ്പർദ്ധ വളർത്തുന്നതും നീതിന്യായ വ്യവസ്ഥയെയും നിയമപരമായി തെരഞ്ഞെടുക്കപ്പെട്ട സർക്കാരിനെയും അട്ടിമറിക്കാൻ ലക്ഷ്യം വെച്ചിട്ടുള്ളതുമാണെന്ന് പരാതിയിൽ ചൂണ്ടിക്കാട്ടുന്നു. കൊവിഡ് വ്യാപനത്തിന്റെ പശ്ചാത്തലത്തിൽ നടത്തുന്ന ഇത്തരം പ്രസ്താവനകൾ രോഗ പ്രതിരോധ പ്രവർത്തനങ്ങളുടെ താളം തെറ്റിക്കുമെന്നും പരാതിയിൽ പറയുന്നു.
ഈ സാഹചര്യത്തിൽ ഇന്ത്യൻ ശിക്ഷാ നിയമത്തിലെ യുക്തമായ വകുപ്പുകൾ ചേർത്ത് ഐഷക്കെതിരെ കേസ് എടുക്കണമെന്നും പരാതിയിൽ ആവശ്യപ്പെടുന്നു.
Discussion about this post