ലാലേട്ടന്റെ ആരാധകർക്കെന്നും പ്രിയപ്പെട്ടതാണ് അദ്ദേഹത്തിന്റെ കുടുംബത്തിന്റെയും വിശേഷങ്ങൾ. ഭാര്യ സുചിത്രക്ക് ഒപ്പം മക്കളുടെ വിശേഷങ്ങൾക്കും ആരാധകർ ഏറെയാണ്. നാല് പേരെയും ഒരുമിച്ചു കാണാനുള്ള സാഹചര്യം കുറവാണെങ്കിലും ചുരുക്കം സമയങ്ങളിൽ കാണാൻ കഴിഞ്ഞാൽ പിന്നെ ആരാധകർക്ക് ആഘോഷമാണ്. അത്തരത്തിൽ ലാലേട്ടന്റെയും കുടുംബത്തിന്റെയും പുതിയ വിശേഷം ഏറ്റെടുത്തിരിക്കുകയാണ് സോഷ്യൽ മീഡിയ. ഭാര്യ സുചിത്രക്കും മക്കൾക്കും ഒപ്പം മോഹന്‍ലാലിൻറെ പെരിങ്ങോട്ടേക്കുള്ള യാത്രയാണ് സോഷ്യൽ മീഡിയയിലെ ലാലേട്ടൻ ഫാൻസ്‌ ആഘോഷമാക്കുന്നത്.
അഞ്ച് ദിവസം മുമ്പാണ് ലാല്‍ കുടുംബത്തോടൊപ്പം ചെന്നൈയില്‍നിന്ന് കേരളത്തിലെത്തിയത്. എറണാകുളത്ത് വന്ന് അമ്മയെ കണ്ടശേഷമാണ് പെരിങ്ങോട്ടുള്ള ഗുരുകൃപാ ആയൂര്‍വ്വേദ ഹെരിറ്റേജിലെത്തിയത്. ഭാര്യ സുചിത്രയും മക്കളായ പ്രണവും വിസ്മയയും അദ്ദേഹത്തോടൊപ്പമുണ്ട്. കുടുംബവും ചികിത്സയുടെ ഭാഗമാകുന്നുണ്ട്. 23 ദിവസം നീണ്ടുനില്‍ക്കുന്നതാണ് അവരുടെ ചികിത്സാവിധികള്‍.
ബറോസിന്റെ ഷൂട്ടിംഗ് പുനരാരംഭിക്കുന്നത് സംബന്ധിച്ചുള്ള ചര്‍ച്ചകര്‍ക്കു കൂടിയായിട്ടാണ് ലാല്‍ എത്തിയിരിക്കുന്നത് എന്നാണ് റിപ്പോർട്ട്. ലോക് ഡൗണ്‍ നീണ്ടുപോകുന്ന സാഹചര്യത്തില്‍ ഷൂട്ടിംഗ് വൈകാന്‍ ഇടയുണ്ട്. അതിനുമുമ്പ് ജീത്തു ജോസഫിന്റെ സിനിമയില്‍ അഭിനയിക്കുമെന്നും റിപ്പോർട്ടുണ്ട്.
കഴിഞ്ഞ സെപ്തംബറിലും ലാല്‍ സുഖചികിത്സയ്ക്കായി ഇവിടെ എത്തിയിരുന്നു. അന്ന് സുചിത്ര മാത്രമേ ഒപ്പമുണ്ടായിരുന്നുള്ളൂ. അവിടുത്തെ ചികിത്സ കഴിഞ്ഞിറങ്ങിയതിനു പിന്നാലെയാണ് ദൃശ്യം 2 ല്‍ ജോയിന്‍ ചെയ്തത്. അന്ന് ലാല്‍ പത്ത് കിലോയോളം ശരീരഭാരം കുറച്ചിരുന്നു. ഡോ. ഉണ്ണികൃഷ്ണന്‍, ഡോ. ഹരികൃഷ്ണന്‍, ഡോ. ശ്രീജിത്ത് മേനോന്‍ എന്നിവരുടെ നേതൃത്വത്തിലാണ് ചികിത്സ.
