വിവരാവകാശ കണക്കുകൾ പ്രകാരം എം.സി ജോസഫൈൻ സ്വീകരിച്ചിരിക്കുന്നത് അരക്കോടിയിലേ രൂപ; യാത്രപ്പടിയായി മാത്രം പതിമൂന്നര ലക്ഷം രൂപ

തിരുവനന്തപുരം: കേരളാ വനിതാ കമ്മീഷൻ അധ്യക്ഷയായ എം.സി ജോസഫൈൻ​ ഓണററിയം ഉൾപ്പടെ സ്വീകരിച്ചത്​​ അരക്കോടിയിലേ രൂപയെന്നും, യാത്രപ്പടിയായി മാത്രം കൈപ്പറ്റിയത്​​ പതിമൂന്നര ലക്ഷം രൂപയെന്നും ​ വിവരാവകാശ കണക്കുകൾ പറയുന്നു.

ചെയർപേഴ്​സൺ ചുമതലയേറ്റത്​ മുതൽ 2021 ഫെബ്രുവരി എട്ട്​ വരെയുള്ള കണക്കുകളാണിത്​. 5,346,279 രൂപയാണ്​ ഇവർ ഇക്കാലയളവിൽ സർക്കാരിൽ നിന്ന്​ സ്വീകരിച്ചത്​.അഡ്വ.സി.ആർ പ്രാണകുമാർ വിവരാവകാശ നിയമ പ്രകാരം നൽകിയ അപേക്ഷയിൽ മാർച്ച്​ നാലിനാണ്​ മറുപടി നൽകിയിരിക്കുന്നത്​.

അഞ്ചിനത്തിലായാണ്​ എം.സി​ ജോസഫൈൻ പണം സ്വീകരിച്ചിരിക്കുന്നത്​. ​​ഓണറേറിയമായി 34,40,000 രൂപയാണ്​ കൈപ്പറ്റിയിരിക്കുന്നത്​. യാത്ര ചെലവിനത്തിൽ ഒപ്പിട്ട്​ വാങ്ങിയത്​ 13,54,577 രൂപയും ടെലഫോൺ ചാർജായി 68,179 രൂപയും എക്​സ്​പർട്ട്​ ഫീ ഇനത്തിൽ 2,19,000 രൂപയും മെഡിക്കൽ റീഇമ്പേഴ്സ്മെന്‍റായി 2,64,523 രൂപയുമാണ്​ കൈപ്പറ്റിയിരിക്കുന്നത്​.