തിരുവനന്തപുരം: ഡിപ്പാര്ട്ടുമെന്റ് ഒഫ് പ്രമോഷന് ഒഫ് ഇന്ഡസ്ട്രി ആന്ഡ് ഇന്റേണല് ട്രേഡ് തയ്യാറാക്കിയ പട്ടികയുടെ നാലാം പതിപ്പില് കേരളം ഇരുപത്തിയെട്ടാം സ്ഥാനത്ത്. ഇതോടെ കേരളം മികച്ച നിക്ഷേപ സൗഹൃദ സംസ്ഥാനമാണെന്ന മുഖ്യമന്ത്രി പിണറായി വിജയന്റെ വാദത്തെ പരിഹസിച്ച് സോഷ്യല് മീഡിയ. രാജ്യത്തെ വ്യവസായ സൗഹൃദ സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും പട്ടികയില് ആദ്യ പത്ത് സ്ഥാനങ്ങളില് പോലും കേരളം ഇല്ലെന്ന് ചൂണ്ടിക്കാട്ടിയാണ് വിമര്ശനം.
സംസ്ഥാന സര്ക്കാര് തങ്ങള്ക്ക് വലിയ പിന്തുണ നല്കുന്നുവെന്ന ഗോയെങ്ക ഗ്രൂപ്പിന്റെ അഭിനന്ദന ട്വീറ്റിന് മറുപടി മറുപടി നല്കവെയായിരുന്നു മുഖ്യമന്ത്രി ഇത്തരമൊരു വാദം ഉന്നയിച്ചത്. ‘ഇന്ത്യയിലെ ഏറ്റവും നിക്ഷേപക സൗഹൃദ സംസ്ഥാനങ്ങളിലൊന്നാണ് കേരളം. അത് തുടരും. സുസ്ഥിരവും നൂതനവുമായ വ്യവസായങ്ങള് ഇവിടെ അഭിവൃദ്ധിപ്രാപിക്കുന്നുവെന്ന് എല്.ഡി.എഫ് സര്ക്കാര് ഉറപ്പാക്കുന്നു’. അദ്ദേഹം ട്വീറ്റ് ചെയ്തിരുന്നു.
എന്നാല്, പിന്നാലെ സോഷ്യല് മീഡിയയില് മുഖ്യമന്ത്രിയുടെ വാദത്തിനെതിരെ പരിഹാസം ഉയര്ന്നു. കേന്ദ്രസര്ക്കാരിന്റെ ഈസ് ഒഫ് ഡൂയിങ് ബിസിനസ് പട്ടികയിലെ സ്ഥാനമാണ് സംസ്ഥാനങ്ങള് നിക്ഷേപക സൗഹൃദമാണോ എന്നതിന്റെ ഔദ്യോഗിക മാനദണ്ഡം. ഏറ്റവും ഒടുവിലെ പട്ടികയില് 36 സംസ്ഥാനങ്ങള്ക്കും കേന്ദ്രഭരണ പ്രദേശങ്ങള്ക്കുമായി 29 സ്ഥാനങ്ങളാണ് നല്കിയിരിക്കുന്നത്. അതില് കേരളത്തിന്റെ സ്ഥാനം 28 ആണെന്ന് ചൂണ്ടിക്കാട്ടി രാഷ്ട്രീയ നിരീക്ഷകന് ശ്രീജിത്ത് പണിക്കരും രംഗത്തെത്തി. കിറ്റെക്സ് വിവാദത്തിന്റെ പശ്ചാത്തലത്തില് കേരളം എന്ത് കൊണ്ട് വ്യവസായ സൗഹൃദ പട്ടികയില് പിന്നാക്കം പോകുന്നു എന്നത് ഇതിനോടകം ചര്ച്ചയായി കഴിഞ്ഞു.
Discussion about this post