മുംബൈ: കോൺഗ്രസിനെ വിമർശിച്ച് വീണ്ടും ശിവസേന മുഖപത്രം സാമ്ന. നേതൃത്വത്തിന്റെയും നേതാക്കളുടെയും കാര്യത്തില് ആശയക്കുഴപ്പത്തിലാണ് കോൺഗ്രസെന്ന് ലേഖനത്തിൽ പറയുന്നു.
ഒരു പാര്ട്ടി അധികാരത്തിലിരിക്കുന്നതോ പുറത്താണോ എന്നതല്ല പ്രശ്നം. ജനങ്ങള്ക്ക് വേണ്ടി അവര് മുഴുവന് സമയവും പ്രവര്ത്തിക്കുന്നുണ്ടോ എന്നതാണ്. അതോടൊപ്പം പാര്ട്ടിയും സംഘടനയും ഒരേസമയം ശക്തമാവുകയും വേണം. ഇതൊന്നും ഇല്ലാത്ത അവസ്ഥയാണ് ഇപ്പോൾ കോൺഗ്രസിനെന്ന് ലേഖനത്തിൽ കുറ്റപ്പെടുത്തുന്നു.
കോണ്ഗ്രസിന് ഇപ്പോള് പല സംസ്ഥാനങ്ങളിലും നേതാക്കളോ സംഘടനയോ ഇല്ല. സംഘടന ശക്തമായാലേ ഉത്തർ പ്രദേശിൽ പാർട്ടിക്ക് വിജയിക്കാൻ സാധിക്കൂ. രാഹുല് ഗാന്ധി പറയുന്നത് ഭീരുക്കള് പാര്ട്ടിയില് വേണ്ട എന്നാണ്. ഈ ഭീരുക്കല് പാര്ട്ടി വിടുന്നത് തുടര്ന്നാല്, പകരം ധീരതയുള്ള പ്രവര്ത്തകരെ ഉണ്ടാക്കാന് സാധിക്കുമോയെന്നും സാമ്ന പരിഹസിക്കുന്നു.
ബിജെപി-ആര്എസ്എസ് സംഘടനാ സംവിധാനത്തില് നിന്ന് കോണ്ഗ്രസിന് ധാരാളം കാര്യം പഠിക്കാനുണ്ടെന്ന് ശിവസേന പറയുന്നു. ഇന്ന് കോൺഗ്രസിന് ധൈര്യമുള്ള നേതാക്കളില്ല. നിലനിൽപ്പിനായി പോരാടുന്ന അവസ്ഥയിലാണ് പാർട്ടി. സംഘപരിവാറിന്റെ പ്രത്യയശാസ്ത്രത്തെ പറ്റി എതിര്പ്പുണ്ടാവും. പക്ഷേ അവരുടെ പ്രവര്ത്തനത്തെ ആര്ക്കും തള്ളിക്കളയാനാവില്ല. അതില് നിന്ന് കോൺഗ്രസ് പഠിക്കണമെന്ന് ശിവസേന ആവർത്തിക്കുന്നു.
Discussion about this post