പല തരത്തിലുള്ള ആഘോഷങ്ങൾ നമ്മൾ കേട്ടിട്ടുണ്ട് എന്നാൽ പ്രേതോത്സവത്തെ കുറിച്ച് കേട്ടിട്ടുള്ളവർ കുറവായിരിക്കും. തായ്ലൻഡ് എന്നും സ്വപ്ന ഭൂമിയാണ്. ബീച്ച് പാർട്ടികൾ, സഫാരികൾ, രാത്രി മാർക്കറ്റുകൾ, നൈറ്റ്ക്ലബ്ബുകൾ, സ്ട്രീറ്റ് ഫൂഡ്, വിസ്മയകരങ്ങളായ ഷോകൾ എന്നിങ്ങനെ കാഴ്ച്ചക്കാരുടെ മനം കവരുന്ന മായിക ലോകം. എന്നാൽ ഈ മായാകാഴ്ചകൾക്കിടയിലും തായ്ലാൻഡുകൾ ചില ആചാരങ്ങളെ മുറുക്കെ പിടിക്കുന്നവരാണ് .
തായ്ലൻഡിലെ ഏറ്റവും ഉൾനാടൻ പ്രദേശമാണു നാൻ. തായ്ലൻഡിലെ പഴയ രാജാക്കന്മാരുടെ ജന്മദേശമാണിത്. നാനിന്റെ താഴ്വരയിലാണ് മിൻ, ലു, മോങ് തുടങ്ങിയ ആദിവാസി – ഗോത്ര വിഭാഗങ്ങൾ പാർക്കുന്നത്. വാട് ഫുമിൻ എന്ന ക്ഷേത്രം ഇവിടെയാണ്.
ഭൂമിയുടെ സംരക്ഷകർ നാട്ടു ദൈവങ്ങളാണെന്ന് അടിയുറച്ചു വിശ്വസിക്കുന്ന അവർ എല്ലാ വർഷവും പ്രേതോത്സവം നടത്താറുണ്ട്. ഓരോ വർഷവും ആകാശത്ത് ആറു തവണ പൂർണ ചന്ദ്രൻ പ്രത്യക്ഷപ്പെട്ട ശേഷമാണ് പ്രേതോത്സവം നടത്താറുള്ളത്.
ജൂൺ – ജൂലൈ മാസങ്ങളിലാണ് ഈ ആഘോഷം. മഴയും കാർഷിക സമൃദ്ധിയും ലഭിക്കുന്നതിനായി നടത്തുന്ന വർണാഭമായ ഉത്സവം കാണാൻ ലോകത്തിന്റെ വിവിധ ഭാഗത്തു നിന്ന് സന്ദർശകരെത്തും.
വളരെക്കാലം മുമ്പ്, വെസന്താര രാജകുമാരൻ ഒരു നീണ്ട യാത്ര നടത്തിയെന്ന് പറയപ്പെടുന്നു. വർഷങ്ങൾ കഴിഞ്ഞതോടെ അവൻ മരിച്ചതായി എല്ലാവരും കരുതി. എന്നിട്ടും, ഒരു ദിവസം അവൻ മടങ്ങിയെത്തി. അത് അവിടെ ആഘോഷമായി മാറി. മരിച്ചെന്ന് കരുതിയയാളാണ് മടങ്ങി വന്നത്.
പ്രേതോത്സവത്തിന് പോകുന്നവർ പ്രേത മാസ്കുകളാണ് ധരിക്കുന്നത്. ഭയപ്പെടുത്തുന്ന രീതിയിൽ വിവിധ നിറങ്ങളിലാണ് ഈ മാസ്കുകൾ തയ്യാറാക്കിയിരിക്കുന്നത്. ട്രെൻഡി ലോയി പ്രവിശ്യയിലെ ഡാൻ സായ് ജില്ലയിലെ തെരുവുകളിലൂടെ ഇവർ സംഘമായി നീങ്ങും.
ഉത്സവത്തിനുള്ള ഒരുക്കങ്ങൾ വളരെ മുൻപേ ആരംഭിക്കും. ഗെയിമുകൾ, സംഗീതകച്ചേരികൾ, പരേഡുകൾ എന്നിവയൊക്കെ പ്രേതോത്സവത്തിൽ ഉൾപ്പെടുന്നു. പല നാട്ടുകാരും തെരുവുകളിൽ നൃത്തം ചെയ്യുന്നത് പേടിപ്പെടുത്തുന്ന മാസ്കും, വസ്ത്രങ്ങളും ധരിച്ചാണ്. അവിടെ ആത്മാക്കളുടെ സാന്നിദ്ധ്യം ഉണ്ടാകുമെന്നാണ് അവരുടെ വിശ്വാസം. ഇത്തരത്തിലുള്ള ഉത്സവങ്ങളിൽ മദ്യവും ഉപയോഗിക്കാറുണ്ട്. ഉത്സവം കഴിഞ്ഞാൽ ഈ മുഖം മൂടികൾ അവർ നദിയിൽ ഉപേക്ഷിക്കും,അടുത്ത വർഷത്തേക്ക് പുതിയ മുഖം മൂടികൾ ഉണ്ടാക്കുകയാകും പിന്നെ. പ്രേതോത്സവം കണ്ട് ഇവരുടെ വിശേഷപ്പെട്ട വൈൻ കഴിക്കാനായി മാത്രം അവിടെ എത്തുന്നവർ അനവധിയാണ്.
https://www.youtube.com/watch?v=5BfpY7bSlfA
Discussion about this post