ബാഴ്സലോണ വിട്ട സൂപ്പർ താരം ലയണൽ മെസ്സി പി എസ് ജിയുമായി കരാർ ഒപ്പിട്ടു. രണ്ട് വർഷത്തേക്കാണ് കരാർ. പി എസ് ജിയിൽ പുതിയ കരിയർ ആരംഭിക്കാൻ സാധിക്കുന്നതിൽ താരം ആവേശഭരിതനാണെന്ന് ക്ലബ് അധികൃതർ അറിയിച്ചു.
പി എസ് ജിയുടെ യൂറോപ്യൻ ചാമ്പ്യൻസ് ലീഗ് കിരീടം എന്ന സ്വപ്നത്തിന് മാറ്റ് കൂട്ടുന്നതാണ് 672 ഗോളുകൾ സ്വന്തം പേരിലുള്ള മെസ്സിയുടെ വരവ്. മെസ്സിയുടെ വരവ് ആഘോഷമാക്കാൻ ആയിരക്കണക്കിന് ആരാധകർ കഴിഞ്ഞ ദിവസം ക്ലബ് ആസ്ഥാനത്ത് തടിച്ച് കൂടിയിരുന്നു.
ഭാര്യക്കും മൂന്ന് മക്കൾക്കുമൊപ്പമാണ് മെസി കഴിഞ്ഞ ദിവസം പി എസ് ജി ആസ്ഥാനത്ത് എത്തിയത്. വിമാനത്താവളത്തിൽ തടിച്ച് കൂടിയിരുന്ന നൂറു കണക്കിന് ആരാധകരെ അദ്ദേഹം അഭിവാദ്യം ചെയ്തു. ബാഴ്സലോണയിൽ മെസിയും നെയ്മറും സുവാരസും ചേർന്നാണ് ഇതിഹാസക്കുതിപ്പ് നടത്തിയതെങ്കിൽ ഇവിടെ നെയ്മർക്കൊപ്പം ഫ്രഞ്ച് സൂപ്പർ താരം എംബാപ്പെയാണ് മെസിയെ കാത്തിരിക്കുന്നത്. വലിയ പ്രതീക്ഷകളാണ് ലോക ഫുട്ബോളിലെ ഏറ്റവും ചെലവേറിയ ഈ മൂന്ന് താരങ്ങൾ ക്ലബ്ബിന് സമ്മാനിക്കുന്നത്.
സ്പാനിഷ് ഡിഫൻഡർ സെർജിയോ റാമോസ്, ഇറ്റലിക്ക് യൂറോ കപ്പ് നേടിക്കൊടുക്കുന്നതിൽ നിർണായക പങ്ക് വഹിച്ച ഗോൾ കീപ്പർ ഡോണറൂമ തുടങ്ങിയവരും പി എസ് ജിയിൽ ഫ്രീ ട്രാൻസ്ഫർ മുഖേന എത്തുന്ന താരങ്ങളാണ്.
Discussion about this post