നല്ല കട്ടിയുള്ള മീശ മുകളിലേക്ക് പിരിച്ചു വച്ച്, കട്ട താടിയുമായി വരുന്നവരെ കാണുമ്പോൾ തന്നെ പറയും, ആഹാ എന്താ ലുക്ക്. എന്നാൽ അതേ രീതിയിൽ മീശ പിരിച്ചു വച്ച് ഇറങ്ങാൻ ഒരു പെണ്ണ് ധൈര്യം കാട്ടിയാലോ.
നീട്ടിയെഴുതിയ കരിമിഴികളും ,മനോഹരമായി ചായം തേച്ച ചുണ്ടുകളും , ഒപ്പം നല്ല കട്ടിത്താടിയും, പൊടി മീശയും. ഇതാണ് ഹർനാം ഗൗർ എന്ന പെൺകുട്ടി. ആറിഞ്ചു നീളത്തിലുള്ള താടി ഒരേ സമയം ഹർനാമിനെ ആൺകുട്ടിയും പെൺകുട്ടിയും ആക്കുന്നു. അതെ, താടിവച്ചു സുന്ദരിയായൊരു മോഡലാണ് ബ്രിട്ടിഷ് സിഖ് മോഡലായ ഹർനാം കൗർ എന്ന 30 കാരി.
പതിനൊന്നാം വയസ്സു മുതലാണ് ഹർനാമിനു മുഖത്ത് രോമ വളർച്ച തുടങ്ങിയത്. തുടർന്നുള്ള പരിശോധനയിലാണ് പോളിസിസ്റ്റിക് ഓവറി സിൻഡ്രോം ആണ് ഇതിനു കാരണമെന്നു മനസ്സിലായത്. ഹോർമോണ് അസന്തുലിതാവസ്ഥ മൂലം ഉണ്ടാകുന്ന ഈ രോഗത്തിന്റെ പ്രധാന ലക്ഷണങ്ങളിലൊന്നാണ് ശരീരത്തിലും മുഖത്തുമുള്ള അമിത രോമവളർച്ച. ഇതിനെ ചൊല്ലി കളിയാക്കലുകൾ തുടങ്ങിയതോടെയാണ് മകളെ സലൂണിൽ കൊണ്ടു പോയി രോമം നീക്കം ചെയ്യിക്കാൻ അമ്മ തീരുമാനിച്ചത്.
എന്നാൽ നീക്കം ചെയ്യുന്നതിനു പിന്നാലെ രോമം വീണ്ടും വളരുന്നത് കണ്ടതോടെ ഹർനാം കൂടുതൽ വിഷമത്തിലായി. വാക്സിങ്ങും ഷേവിങ്ങും ത്രെഡിങ്ങുമൊക്കെയായി ദിനങ്ങൾ കടന്നുപോയി. പതിനഞ്ചാം വയസ്സിൽ ഹർനാം സ്കൂൾ പഠനം നിർത്താൻ തീരുമാനിച്ചു. ആത്മഹത്യയ്ക്കു പോലും ശ്രമിച്ച ദിനങ്ങളുണ്ടായി.
എന്നാൽ കളിയാക്കലുകൾ തുടർന്നപ്പോൾ ഹർനാമിന്റെ ഉള്ളിലും വാശിയായി. അങ്ങനെയാണ് താടി നീക്കാനായി പാർലറുകളിലേക്കുള്ള യാത്രകള് അവസാനിപ്പിക്കാൻ തീരുമാനിക്കുന്നത്. തല മറയ്ക്കാൻ ഒരു ടർബനും ധരിച്ചു തുടങ്ങി. അതു പൂർണമായും മതവിശ്വാസത്തിന്റെ ഭാഗമായിട്ടായിരുന്നു.
താടിയുമായി ജീവിക്കുന്നതു നിങ്ങൾക്ക് ഒട്ടും ആത്മവിശ്വാസം നൽകുന്നില്ലെങ്കിൽ അതു നീക്കം ചെയ്യുക തന്നെ വേണം. അതല്ലെങ്കിൽ ആ താടി വച്ചു തന്നെ ജീവിതം ആഘോഷിക്കണം. എന്റെ ശരീരം, എന്റെ നിയമങ്ങൾ – ഞാൻ അതിലാണു വിശ്വസിക്കുന്നത്. ആർക്കും അതിനെ തടയിടാനാകില്ല’- സ്വന്തം മുഖത്തെയും , ഇഷ്ടങ്ങളെയും കുറിച്ച് ഹർനാം പറയുന്നത് ഇങ്ങനെയാണ്. ലണ്ടൻ ഫാഷൻ വീക്കിൽ താടിയുമായി റാംപ് വോക് ചെയ്ത ഏക പെൺകുട്ടി എന്ന ബഹുമതിയും ഹർനാമിനു സ്വന്തം.
കാണുമ്പോൾ അരോചകമായി തോന്നുന്നെന്നും താടി നീക്കം ചെയ്യണമെന്നും പറഞ്ഞു. നിനക്കു നല്ലൊരു ജോലി ലഭിക്കില്ലെന്നും വിവാഹം കഴിക്കാൻ കഴിയില്ലെന്നും വരെ പറഞ്ഞവരുണ്ട്. പക്ഷേ അവയൊന്നും ഹർനാമിനെ തളർത്തിയില്ല.
മുഖത്തൊരു പാടോ കുരുവോ വന്നാൽ അപ്പോൾ ആശങ്കപ്പെടുന്ന മുഴുവൻ പെൺകുട്ടികളും കണ്ടുപഠിക്കേണ്ടതാണ് ഹർനാമിനെ. ഇക്കാലമത്രയും പലരും തന്റെ ശരീരത്തിലെ വൈകല്യം പോലെ താടി വളർച്ചയെ കണ്ടപ്പോൾ അതിലൊന്നും അടിയറവു പറയാതിരുന്നതാണ് ഹർനാമിന്റെ വിജയം.
പൂർണ്ണ വളർച്ചയെത്തിയ താടിയുള്ള ലോകത്തെ ഏറ്റവും പ്രായം കുറഞ്ഞ സ്ത്രീ എന്ന നിലയിൽ ഗിന്നസ് ബുക്കിൽ ഇടം പിടിച്ചിരിക്കുകയാണ് ഹർനാം.
Discussion about this post