ലഖ്നൗ: ബിജെപി എം എൽ എമാരെയും സംസ്ഥാന മന്ത്രിമാരെയും ചാക്കിട്ട് പിടിക്കാൻ ഊർജ്ജിത ശ്രമം നടത്തുന്ന സമാജ് വാദി പാർട്ടി നേതാവ് അഖിലേഷ് യാദവിന് കനത്ത തിരിച്ചടി നൽകി അനുജൻ പ്രതീക് യാദവിന്റെ ഭാര്യ അപർണ യാദവ് ബിജെപിയിൽ ചേരുന്നു. ഉത്തർ പ്രദേശ് മുഖ്യമന്ത്രി യോഗി ആദിത്യനാഥിന്റെ സാന്നിദ്ധ്യത്തിൽ അപർണ നാളെ ബിജെപിയിൽ ഔദ്യോഗികമായി അംഗത്വം സ്വീകരിക്കുമെന്ന് രാഷ്ട്രീയ വൃത്തങ്ങളെ ആസ്പദമാക്കി ദേശീയ മാധ്യമം റിപ്പോർട്ട് ചെയ്യുന്നു.
അപർണ യാദവ് ബിജെപിയിൽ ചേരുമെന്ന വാർത്ത ഹരിയാനയുടെ ചുമതലയുള്ള ബിജെപി നേതാവ് അരുൺ യാദവ് സ്ഥിരീകരിച്ചു. പ്രതിപക്ഷ പാർട്ടികളുടെ ഐക്യം രൂപപ്പെടുത്തി ബിജെപിയെ നേരിടാൻ കൊണ്ടു പിടിച്ച ശ്രമം നടത്തുന്ന അഖിലേഷ് യാദവിന് ഓർക്കാപ്പുറത്ത് കിട്ടിയ പ്രഹരമായാണ് സഹോദരപത്നിയുടെ ബിജെപി പ്രവേശനം.
ഉത്തർപ്രദേശിൽ സാമൂഹ്യ സേവന രംഗത്ത് പ്രശസ്തയാണ് മുലായം സിംഗ് യാദവിന്റെ ഇളയ മകൻ പ്രതീക് യാദവും ഭാര്യ അപർണ യാദവും. രാഷ്ട്രീയ വിഷയങ്ങളിൽ നിന്നും പരമാവധി അകലം പാലിച്ചു കഴിയുന്നവരാണ് ഇരുവരും. ‘ബി അവെയർ‘ എന്ന പേരിൽ സ്ത്രീകൾക്കും കുട്ടികൾക്കും വേണ്ടി ഇവർ ഒരു പുനരധിവാസ കേന്ദ്രം നടത്തുന്നുണ്ട്. കേന്ദ്ര സർക്കാരിന്റെയും പ്രധാനമന്ത്രി നരേന്ദ്ര മോദിയുടെയും വിട്ടുവീഴ്ച ഇല്ലാത്ത നയങ്ങൾ ഉത്തർ പ്രദേശിൽ കൊണ്ടു വന്ന വികസനം കണ്ണുള്ളവർക്ക് കാണാൻ സാധിക്കും എന്ന അപർണ യാദവിന്റെ പരാമർശം നേരത്തെ വാർത്തയായിരുന്നു.
