തിരുവനന്തപുരം: വിഴിഞ്ഞം സംഘര്‍ത്തിന്റെ പശ്ചാത്തലത്തില്‍ ഫിഷറീസ് മന്ത്രി വി. അബ്ദുറഹിമാനെതിരെ പരാമര്‍ശം നടത്തിയ സമര സമിതി കണ്‍വീനര്‍ ഫാ. തിയോഡേഷ്യസ് ഡിക്രൂസിനെതിരെ ഗുരുതര ആരോപണങ്ങളുമായി എഫ്‌ഐആര്‍. ഫാ.തിയോഡേഷ്യസ് കലാപത്തിനും മുസ്ലിം-ക്രിസ്ത്യന്‍ വിഭാഗങ്ങള്‍ക്കിടയില്‍ വര്‍ഗീയ ധ്രുവീകരണത്തിനും ശ്രമിച്ചെന്ന് എഫ്‌ഐആറില്‍ ആരോപിക്കുന്നു.
ഐഎന്‍എല്‍ സംസ്ഥാന കമ്മിറ്റിയുടെ പരാതിയുടെ അടിസ്ഥാനത്തില്‍ ഫാ.തിയോഡേഷ്യസിനെതിരെ കഴിഞ്ഞ ദിവസം കേസ് രജിസ്റ്റര്‍ ചെയ്തിരുന്നു. തിരുവനന്തപുരം സിറ്റി പോലീസ് കമ്മീഷണറുടെ നിര്‍ദ്ദേശത്തില്‍ വിഴിഞ്ഞം പോലീസാണ് കേസെടുത്തത്. വിഴിഞ്ഞം തുറമുഖ വിരുദ്ധ സമര സമിതി കണ്‍വീനര്‍ കൂടിയായ ഫാ. തിയോഡേഷ്യസിന്റെ പരാമര്‍ശത്തിനെതിരെ കെ ടി ജലീല്‍ അടക്കമുള്ളവര്‍ രംഗത്ത് വരികയും കൂടി ചെയ്തതിന്റെ പശ്ചാത്തലത്തിലാണ് ഇപ്പോള്‍ ഗുരുതര ആരോപണങ്ങള്‍ ഉന്നയിച്ച് കേസെടുത്തിരിക്കുന്നത്.
സമരക്കാര്‍ രാജ്യദ്രോഹക്കുറ്റമാണ് ചെയ്യുന്നതെന്ന മന്ത്രിയുടെ പരാമര്‍ശത്തിനെതിരെ ഫാ.തിയോഡേഷ്യസ് നടത്തിയ പ്രസ്താവനയാണ് വിവാദമായത്. ലോകം കണ്ട ഏറ്റവും വലിയ രാജ്യദ്രോഹി മന്ത്രിയാണെന്നും മന്ത്രിയുടെ പേരില്‍ തന്നെ രാജ്യദ്രോഹി ഉണ്ടെന്നുമടക്കമുള്ള പരാമര്‍ശങ്ങളാണ് ഫാ.തിയോഡേഷ്യസ് നടത്തിയത്. എന്നാല്‍ വിവാദമായതോടെ പരാമര്‍ശം പിന്‍വലിച്ച് അദ്ദേഹം ഖേദപ്രകടനം നടത്തി. തന്റെ പ്രസ്താവന സമുദായങ്ങള്‍ക്കിടയില്‍ ചേരിതിരിവിന് കാരണമായതില്‍ ഖേദിക്കുന്നുവെന്നാണ് അദ്ദേഹം അറിയിച്ചത്.
ഇതിന് പിന്നാലെയാണ് മതവിദ്വേഷം വളര്‍ത്താനുള്ള ശ്രമം, സാമുദായിക സംഘര്‍ഷത്തിനുള്ള ശ്രമം എന്നീ വകുപ്പുകള്‍ ചുമത്തി ഫാദറിനെതിരെ പോലീസ് കേസ് രജിസ്റ്റര്‍ ചെയ്തത്. മന്ത്രിക്കെതിരായ പ്രസ്താവന ജനങ്ങളെ പ്രകോപിപ്പിക്കാന്‍ ലക്ഷ്യമിട്ടുള്ളതാണെന്നും എഫ്‌ഐആറില്‍ പരാമര്‍ശമുണ്ട്.
Discussion about this post